June 3, 2016

[1994] 鄒靜.九四.中 (第二張唱片 - 了解)




















記得好多年前第一次睇到呢個唱片封面嘅時候,第一個反應係:好驚呀,點解淨係得個頭架,究竟係人係鬼定動物呀 (哈哈講笑啦!),第二個反應係:好似周影 (兩者同喺內地出生,個名又係兩個字,亦咁啱出咗兩張唱片,而周嘅第二隻碟 <還仍然想我嗎> 個封面都同呢張一樣咁詭異全白色得個頭),加上網上有關呢隻碟嘅資訊近乎零:YOUTUBE只有慢熱嘅 抵押,而 誰在開始不是好對像 又試過入選某網誌嘅西歌大比拼,搞到我一路都誤以為呢隻碟係行錯另類冷門路線而成為阿靜嘅最後一碟,但當我真正去了解呢張 <了解> 嘅時候,先發現自己真係大錯特錯......

CP-20132 (CD/CASETTE)




















了解




























睇得出公司每次都好肯揼本幫阿靜做碟,好似今次美指同攝影就搵咗WING SHYA老師,化妝就繼續係ZING老師負責,絕對唔講得笑,同上次仙氣女神形象唔同,今次輯相大玩造型,先嚟封面做小丑 (應該係為咗配合 不想再假裝 而度嘅? 但明明訂夏天出碟,睇見都熱......),再扮羅密歐與茱麗葉(?),另一張又有啲似美人魚(?)。

exhibits in 娛記正傳 taken by fan angela aka yuki, see full credit below




















而另一樣特別嘅係個包裝設計,大家都知94年唱片公司為咗反翻版都不遺餘力製作大唱片去吸引樂迷收藏,而今次隻碟先以長紙套做包裝,裡面放入一般CD盒同一本獨立嘅歌詞書仔,可惜因為咁,要喺市面搵到齊料嘅版本絕對唔易,而同時搵到有心人搵到歌詞/CREDIT就更難......




















講到今次隻碟最令我驚喜嘅一定係歌曲嘅質素,好似上面個唱片廣告咁,成隻碟十首歌公司竟然敢落六首咁多做推介,呀又真係好嘢喎,耐聽度真係比第一隻碟高咗,除咗先前介紹過嘅主打 鍾情他香氣不想再假裝 之外,大碟點題作 了解 亦都係阿靜'94脫胎換骨之作 (亦係小弟全碟最鍾意嘅一首)。






















了解 改編自XSCAPE 93年嘅單曲 UNDERSTANDING,嘩! 黑人R&B/SOUL喎,已經同第一隻碟嘅寶記玉女式製作完全兩個層次,細心去聽嘅話,首歌嘅節奏、編曲同和音部份都好有年頭HIT爆嘅金曲 女人的弱點 嘅影子,再加埋例牌菲式唱腔同AD-LIB,完全睇到監製嘅野心,歌詞方面,原版講想男友多啲真正溝通多啲了解自己,嚟到阿靜嘅版本角度一轉,講 '因了解而分開',歌詞第一句 '了解冰天雪地上路甚難 誰人令這雪下路人 嚴寒夜空帶淚獨行' 已經好有畫面,整份歌詞自省感慨意味重,唔係一味愛,有啲深度。




















而另一首同樣探討愛情觀嘅主打就係放喺B1位置嘅 抵押,顧名思義歌詞內容係講人以愛抵押去賭自己嘅一生幸福,曲式偏向民歌,我自己就好鍾意個編曲,簡單舒服得嚟又帶啲小酒吧唱LIVE嘅味道,不過今次阿靜認真抵打,上 <勁歌金曲> 現場唱呢首嗰陣,尾段有一句甩咗拍子唱慢咗 (2:35),不過好快比佢兜得返 (2:49) 仲兜得幾靚添,基本上無聽過CD版嘅人係唔會知佢甩咗,算你啦。




















大家無眼花,阿靜上面呢兩個KTV忽然變返長頭髮,點解? 某雜誌專訪曾經提及其實呢張碟嘅錄音工作早喺四月底已完成,只不過阿靜要趕拍 <江山如此多FUN> 所以先延遲推出,我諗呢兩個KTV就係嗰時一早拍落嘅 (甚至係先行主打?),咁呢兩隻究竟係咩歌呢? 無錯,就係 愛等於一切 同埋 容易糊塗,咁點解揀呢兩隻嚟谷呢? 因為分別係盧東尼老師同徐日勤老師嘅大作囉!





抵押 一樣,愛等於一切 都係講愛情難以觸摸難以估計,但今次又轉個角度,唔講自己點樣甘心落注,反而講要活在當下順其自然,之前 鍾情他香氣 講三角苦戀,而今次 容易糊塗 仲激,三角都唔夠要整夠四角,而且阿靜仲要係主導嗰個,手掌係肉手背又係肉,唔知揀邊個先好。


















講吓講吓就到SIDE TRACKS,沒有得到你 係小弟嘅心水,呢首可以話係 容易糊塗 嘅下集,容易糊塗 都尚且企喺分岔口三心兩意得個講字,而 沒有得到你 就正式去馬,以為借到水泡報復男友不忠點知反而仲寂寞仲放唔低,呢段女人心事交代得幾好,而最正嘅係編曲夠晒MOODY,非常適合拍埋第一隻碟嘅 是誰是錯WHERE IS MY LOVE TONIGHT? 一齊聽。



走過錯綜嘅關係同複雜嘅心路,喺接近尾聲嘅B3位置,阿靜終於迷失喺夜與慾之間,迷糊反問自己一個最基本嘅問題:他算不算戀人,呢首改編自陣內大藏89年嘅作品 すわたROMANTICIST,編曲感覺好似入咗個祭祀大典/神秘夜會咁幾特別,好配合到嗰種痴痴迷迷嘅感覺 (又想講好啱做阿靜之後嘅電視劇 <白髮魔女傳> 嘅插曲),尾段仲要係咁唱 'DI-DAR',監製用意喺邊唔使多講啦。



















講咗咁耐,唔知大家有無發現今次隻碟居然一首跳舞快歌都無,唔似得第一隻碟咁快慢平均各領風騷,不過都叫做有兩首快少少嘅西歌 瘋戀千千晚誰在開始不是好對像 分別放喺AB兩面嘅最後一CUT,攞嚟間吓場提吓神。


























A SIDE代表 瘋戀千千晚 一睇個歌名已經夠晒西夠晒癲啦,成個猴擒大姐上身咁,仲未FEEL到? 醒多你一句歌詞 '你沒法避過我臂彎 聽聽我無理智的呼喊 我熱愛極熾烈燒滾我心多麼猛',唔講仲以為唱緊 我要你每夜陪住我




















反而B SIDE代表 誰在開始不是好對像 就瀟灑不羈得多啦,一夜風流後頭也不回,我特別鍾意唱片廣告入面嗰句TAG歌嘅SLOGAN '誰在開始不是好對像 只因...了解',實在講得太好,因了解而放任... 因了解而撇脫... 我承認呢首西在旋律似 阿LAM日記 夠狂夠亂同埋歌名值得商榷 (對像VS對象),但其實本身個編曲好型,好有聽日本LIVE BAND SHOW嘅感覺架。



正如我上一篇所講,今次隻碟完全感受得到阿靜同製作人嘅進步:歌曲風格統一成熟,歌詞緊扣概念主題,編曲唱腔入時,阿靜亦唱得出自己嗰種有血有肉嘅倔強同率性,整體感覺無第一隻碟咁鬆散同虛幻,如果彭家麗無用到 <徘徊> 做碟名,放喺阿靜到都不為過!


photo credit: 彌敦道人與車@weibo (12, 14, 17, 20, 21, 23, 25 of 26);
linda liu@sina blog (15, 18 of 26);
祐希的凝望@blogger (4 of 26)

5 comments:

  1. hi 樓主,想知道了解全碟我曲詞人credits呀
    想在wiki建這頁,如沒有full credits會被報廢了....

    https://zh.wikipedia.org/wiki/%E4%BA%86%E8%A7%A3_(%E5%B0%88%E8%BC%AF)

    ReplyDelete
    Replies
    1. HI!! 唔好意思呀我都無嗰本歌詞集呀暫時幫唔到你... 我同你一樣都好想知道晒啲CREDITS呢... 希望會有其他粉絲睇到幫忙啦!!

      Delete
    2. 見到有人up左

      鍾情他香氣 吳通明 何寵兒 第二主打 4:10
      2. 不想再假裝 Quinn Ng Quinn Ng 第一主打 4:40
      3. 了解 Manuel Seal 盧永強 改編自XSCAPE的《Understanding》 4:37
      4. 容易糊塗 徐日勤 宋永前 4:12
      5. 瘋戀千千晚 Graeme Clark
      Marti Pellow
      Neil Mitchell
      Tom Cunningham 吳穎儀 4:31
      6. 抵押 [4] Benmont Tench III 因葵 第三主打 3:42
      7. 沒有得到你 Lionel B Richie 盧永強 4:17
      8. 他算不算戀人 [5] 陣內大藏 盧永強 改編自陣內大蔵的《すれたRomanticist》 4:24
      9. 愛等於一切 盧東尼 因葵 3:39

      Delete
    3. 嗱都話阿靜好多FANS架啦! 雖然未算最完整但都好想多謝勁人出手!

      (P.S. 小弟自己呢邊唔敢亂搞WIKI,呢到會以圖片同無聊筆記為主,資料性嘅嘢...我無乜信心...都係交比神級高手做啦!)

      (P.S. 你地嘅留言又提醒咗我唔好咁懶要多多更新呢到! 等我!!)

      Delete
    4. 點解唔敢攪wiki呀?

      Delete