December 3, 2018

[1992] 情危夜合花 (演出 鄒靜)


藍潔瑛姐姐嘅離世令人惋惜,但亦因為掀起重播熱潮令我終於有機會睇得返阿靜呢套漏網之作:由藍潔瑛、林其欣、朱潔儀、曾偉權主演嘅電視電影 <情危夜合花>,其實今次都好正,因為應該係阿靜唯一一次做MADAM!


故事講述舞小姐藍成功上岸做名門少奶,卻得悉最親嘅媽媽生李麗麗墮樓慘死,搵私家偵探一查之下發現最大嫌疑嘅竟然係當年嘅好姊妹林,只好忍痛向警方報案,阿靜成班即刻做嘢上門塔人,原本另一個洗底做明星嘅姊妹朱可以幫林做證,但因唔想被翻舊帳斷送星途而決定比假口供,面臨死刑嘅林當場崩潰發癲,阿靜幾個拉返佢入羈留室冷靜 (哈哈上次 <共闖天涯> 阿靜喺差館度叫囂搞事,今次就調返轉要以MADAM身份叫人收聲)。

-----------------------
留言小教學 (不用註冊):
1. 在下方留言格內輸入留言
2. 在 'Comment as:' 一格內揀選 'Name/URL',小視窗隨即彈出
3. 在 'Name' 一格內輸入你的稱呼,'URL' 一格漏空,再按 'Continue'
4. 按 'Publish' 送出留言
-----------------------

November 22, 2018

[1996] 聊齋之秋月還陽 (下) (鄒靜 飾 春花)


成日都講阿靜嘅形象真係可以好多變,明明都係同一套 <聊齋>,啱啱先喺 <狐仙報恩> 度扮完惡頂衰格大小姐,轉個頭就喺同羅嘉良、俞小凡、陳鴻烈、劉丹合演嘅壓軸單元 <秋月還陽> 入面180度反轉做返個討喜嘅烏龍傻妹仔。


做得羅家嘅賣身婢女,阿靜主力負責打點家中上下事務,尤其對班小少爺小小姐照顧有加,睇吓真係張張圖都攬到佢地實一實架。


阿靜雖然平時論論盡盡食嘢又打爛嘢咁,但其實個底都係醒嘅,唔止識請碟仙,仲幫羅除綠帽,拆穿妖女樊亦敏搵佢做便宜老豆嫁入門嘅奸計,所以都叫做旺主人。


嗱對比上次 <狐仙報恩> 啲面口,睇吓阿靜今次啲表情同笑容幾靚幾純,活潑可愛嘅阿靜終於都返嚟啦!


呢幕大懵阿靜又衰懶訓豬搞到整唔見大少奶林其欣支釵,騰晒雞咁喊住搵神機妙算嘅二少奶余幫佢卜卦搵返出嚟,睇吓佢搵返支釵個樣開心到當正余神咁拜。


余幫咗個咁大嘅忙阿靜當然要喺重要關頭報返恩啦,上面提到樊為嫁唔到入羅家一直懷恨在心,先前已用盡方法阻止情敵余還陽,今次再夾計綁佢到十面尼李麗麗面前施法加害,誓要將佢打回女鬼原形,眼白白睇住少奶比人捉走嘅阿靜第一時間趕返去通報求救,點知去到壇內救余之際慘被艾威嘅飛刀傷及脊骨要永久卧床,不過好人有好報,得林同余悉心照料之下阿靜最終奇蹟地企得返起身行得走得。


哈哈吊咗大家好耐癮,傳說中嘅 '靜敏之交' 剪報終於都出現啦! 等我仲一直以為佢地喺 <佳人有約> (港姐 VS 訓練班) 或者 <勁歌金曲> (主持 VS 歌星) 度已經識,原來都要去到 <聊齋> 咁後期先熟 (不過好可惜佢地喺 <秋月還陽> 入面嘅同框/對手戲剪到近乎無......),今次訪問仲有提及阿靜嘅音樂動向,原來阿靜一心等97年過台灣發展 (之前更傳已簽藝能動音),實情係搞到成99年先簽得成公司而最後亦出唔成國語碟,究竟中間發生咗咩事? 等小弟寫到去99年再同大家講啦!


門匙牀鋪俱備 鄒靜免費入住樊亦敏香閏

記得參選港姐期間,樊亦敏和何婉盈曾是一對投契的好姊妹,當時更有一句可歌可泣的經典句語:「三號(樊)同四號(何)永遠都會喺埋一齊!」

不過,經時日洗鍊之下,四號佳麗已換上另一人——看似與Amy風馬牛不相及的鄒靜小姐。消息傳來,鄒靜與樊亦敏的感情甚至好到要住在同一屋簷下,實行展開「新同居時代」。

在未歃血為盟結義金蘭之前,鄒靜先來闡釋因何要與Amy同居一室:「我們不錯是好朋友,有段時間我要搬屋,中間有一個月的真空期,本來我想搬回媽咪家暫住,但Amy說橫豎自己也是一個人住,不如搬來陪陪她吧,後來發覺大家確實好好傾;就算我現在搬走了,Amy也特別買了一張牀,讓我隨時可以到她家過夜。」

她們是如何結緣的? 鄒靜說是拜《聊齋》所賜:「我們一起到武夷山拍外景,得閒沒事做,傾傾吓就變成好朋友。我好鍾意Amy,她對朋友很真,對我亦很關心。」

話說回頭,久違了的她,近況如何? 「我在去年十二月已和TVB滿約了,本來打算到台灣唱歌的,但因為我簽不到台證(她從大陸來港不足七年),要再過一年才能啟行。」事實上,無線的出手之低,也是她離開的原因。「之前我一直都沒有太多機會,臨走前演的《娛樂插班生》,更是可有可無的角色。雖然他們肯加我四成騷錢,但因為我簽得騷少,一年得六十個,我覺得加極也沒有太大保障,所以便離開了。」

在這段等待黎明的日子,她賴以登台維生:「由滿約到現在,我大概到大陸登台十多次,每次價錢有多有少。好的,去一次唱二、三晚有幾萬元,但如果遇著老闆孤寒些,幾千蚊場都要唱……」她帶笑自嘲:「我又不是什麼巨星,為生活,唯有大小通殺囉!」


不用擔心經濟問題

正因為鄒靜這分「不扮高深,只求搵銀」的性格,令她總算不用擔心經濟問題:「我一向都好節衣縮食,有時一個星期也用不上五百元,而且我又沒有養家負擔,爸爸甚至會間中給錢我用。」登台不用置裝嗎? 「又沒有傳媒採訪,我一件衫可以穿好多次的。」她最大的支出,只是每月萬幾元的屋租,所以她甚至可以儲到個錢,積穀防飢。

樊亦敏眼中的鄒靜,則是個不太圓滑的爽直女孩:「她可以好cool的,不關她事的話,她完全話之你,不過,她其實是個好純的女孩子。」

鄒靜事業出現阻滯,Amy一定有從經濟與精神上雙管齊下支持老友吧? 她略有保留:「大家出來吃飯,誰人埋單這些不用計,最重要是,她有什麼不開心,大可以跑來找我,她連我屋企鎖匙都有!」Amy對鄒靜的信任程度,直可以肝膽相照、義本無言形容之。

Amy不諱言有時即使約了大班朋友吃飯消遣,她也會叫埋鄒靜一塊出來,好讓她認識多些新朋友。有時Amy帶些候選男友讓鄒靜過目,靜妹亦會給予寶貴意見與評語,讓她好好參詳一番。

那麼,Amy的真命天子出現沒有? 她還是那一句:「未落實的事,我不想公開。我想要到我嫁得出,才會公開一切了。」看來,要取得Amy芳心,鄒靜這一關是非過不可,各位要學好「愛屋及烏」之道了。



講真佢地啲合照真係幾養眼,兩個靚得嚟又襯真係好難得,亦都戥佢地開心呢能夠喺圈中搵到好姊妹交心!

photo credit: 彌敦道人與車@weibo (7 of 11)

-----------------------
留言小教學 (不用註冊):
1. 在下方留言格內輸入留言
2. 在 'Comment as:' 一格內揀選 'Name/URL',小視窗隨即彈出
3. 在 'Name' 一格內輸入你的稱呼,'URL' 一格漏空,再按 'Continue'
4. 按 'Publish' 送出留言
-----------------------

September 22, 2018

[1996] 聊齋之狐仙報恩 (上) (鄒靜 飾 王玉芝)


寫咗咁耐終於都寫到阿靜離巢最後一套出街嘅經典大劇 <聊齋> 啦 (真正學滿出師跳出COMFORT ZONE嘅新一頁)! 呢次阿靜有份參演兩個單元,首先介紹同羅嘉良、俞小凡、黃文豪、陳鴻烈合演嘅 <狐仙報恩>,下篇再講另一單元 <秋月還陽>


今次阿靜繼續飾演佢最拿手嘅刁蠻大戶千金小姐 (認得隔離做佢妹仔嘅羅雪玲嗎? 記得佢地新人時期合作過嘅 <點解香港咁過癮><我為錢狂> 嗎?),專門喺老尷場面出力剝花生同火上加油。


做得古裝劇當然唔會就咁埋沒阿靜嘅文藝氣質啦,繼上次 <南京的基督> 大唱評彈,今次阿靜喺阿爹嘅壽宴入面粉墨登場表演 <麻姑上壽>,連大駕光臨嘅VIP相國大人李龍基都拍案叫絕比晒LIKE。


奄尖高竇嘅太常府二小姐阿靜眼角好高,只對住喺隔離嘅給諫府大少爺黃睇得上眼,上次提過阿靜啲眼神越做越SHARP,睇吓左上圖見到OPPA個樣冧滋滋嗒晒糖咁,呻醋時右下圖即刻一秒西面霸氣怒啤,啲氣場勁到呢。


阿靜咁主動姣仔已經唔矜貴唔馨香,更何況黃嘅真正目標竟然係佢個美艷大嫂俞,原來佢一直葡萄羅傻人有傻福娶到個靚女做老婆,誓要搶佢返嚟,不過俞呢隻小狐仙一心只為向羅報恩,對佢忠貞不二,所以黃FLIRT極都係得個桔。


以為阿靜睇到男神變狗公嘅醜態會醒? 點知姣婆都係守唔到寡,居然走去同佢講食唔到葡萄就比佢嗒吓酸梅,既然主動送埋入口,黃食得唔好嘥直闖阿靜閏房曳曳 (都話阿靜套套劇情都好似 <黃浦傾情> 架啦哈哈),不過當然變咗搞笑版啦,嗰晚成家玩嘢輪流敲門搵阿靜 '談心',阿靜左攔右擋下黃慘變 '衣櫃裡的男人' 差啲焗死,頂唔順要跳窗走佬。


事後黃家誤會靜家同相國大人交好,急不及待上府提親拉關係,實情係羅得罪佢被帶走,同時間皇帝陳嘉輝又遇害失蹤,頓失靠山嘅靜家迅速失勢,黃即對婚事放軟手腳,驚住無人埋單嘅阿靜搲爛塊面單人匹馬踩入黃家大吵大鬧,攞晒彩嘅黃乘機獅子開大口,要求擸盡阿靜家傳四寶做嫁妝先肯抬轎迎娶,比人撳住搶嘅阿靜返到屋企比兩老鏟到上天花板,難得自細聰明伶俐但而家居然倒蝕認真羞家。


最終羅得天地靈氣變返正常,並因救駕有功而獲賜封大將軍,阿靜呢邊又大逆轉處返上風,有咁耐風流嘅黃結果死死地氣入贅靜家,仲要比人撳住個頭拜堂哈哈。


雖然 <聊齋> 喺96年先正式播出,但其實早喺上年年中已完成拍攝,所以當時仲係公司中流砥柱嘅阿靜仍然同好姊妹樊亦敏攬頭攬頸孖住出席下面嘅煞科慶功宴,想知佢地因乜解究咁FRIEND? 咁就唔可以錯過下回篇章啦!


嗱悉心打扮係有回報,睇吓即刻有幾多雜誌搵阿靜做FASHION MODEL! 朋友同我講話而家日本都興返咁著呢!


photo credit: 彌敦道人與車@weibo (9, 10, 11, 12 of 17)

-----------------------
留言小教學 (不用註冊):
1. 在下方留言格內輸入留言
2. 在 'Comment as:' 一格內揀選 'Name/URL',小視窗隨即彈出
3. 在 'Name' 一格內輸入你的稱呼,'URL' 一格漏空,再按 'Continue'
4. 按 'Publish' 送出留言
-----------------------

July 3, 2018

[1995] 普通話戲中戲 (演出 鄒靜)


原本以為阿靜呢個普通話人會順利成章幫港台拍落大量普通話節目,點知前嗰幾年完全唔覺有 (如有漏網之魚請告知),明明同公司嘅阿菲、黃翊、劉玉翠都有份拍吓 <唱談普通話>,反而阿靜要等到完約先有機會獲邀拍攝由莫文蔚主持嘅新一輯問答遊戲節目 <普通話戲中戲>


今次阿靜同何超儀聯手用雙語合演三個圍繞 '美' 嘅故事,第一個短劇 <影子> 講述佢地兩個潮女不謀而合三次撞衫,咁有緣終於忍唔住喺石板街頭相認搭訕 (認得對黑BOOT同個黑袋嗎? 呢! <刑事偵緝檔案II> 觀禮嗰場見過架呢!),二人一見如故惺惺相惜,邊行落碼頭邊談穿衣之道。


第二幕 <鏡子> 寫到名店櫥窗人像何受夠被安排嘅男仔頭裝束,跪求真.女神阿靜施法賜予靚靚妝容還心願,點知越試越貪最終迷失喺花花世界入面,先發現活出真我就係最靚。


嗱嗱嗱好戲在後頭! 阿靜喺最後呢場 <玻璃> 入面大爆SEED,直頭當正自己拍緊王家衛咁,一開波已經嚟料反轉成個客廳扮厭世玩自殺 (嘩右上圖真係同KELLY世界級撞樣!)。


鏡頭一轉,成身金過倫敦金嘅阿靜躝上床倒吓安眠藥 (大佬正到真係好A貨王家衛FEEL哈哈)。


間房咁DARK咁BLUE梗係要玩埋刀仔同勒埋頸仔啦 (睇返以前就算係健康節目,內容都比而家更大膽開放......)。


壓軸一擊紅衣怨鬼LOOK,上晒身嘅阿靜開爐落簾攬埋紮紅玫瑰淒美清唱 不了情 (難得有機會可以再喺幕前唱歌呢!)。


比阿靜個死亡來電嚇到個心離一離嘅閨蜜何仆上去救人,點知阿靜話試完咁多款都係覺得無樣可以令佢靚住咁死 (記得個主題係 '美' 嗎哈哈),比佢玩殘嘅何無咁好氣諗住煮個麵食,阿靜回過神先醒起自己啱啱先玩完煤氣,好彩睇佢地最後攬頭攬頸就知係HAPPY ENDING啦!


睇返以前嘅節目,不期然會好懷愐90年代嘅風光鼎盛,即使只係港台嘅一輯教育節目,一眾天王天后歌影視偶像紛紛排住隊參演/擔任嘉賓,拍出嚟嘅成品既有誠意又帶電影感,就連問答環節都唔係就咁拍廠景而係動員大量人力物力去唔同地方搭外景 (各大商場、HMV、西港城甚至黃金海岸),從細節位可以感受到當年資源、人才嘅充裕同埋娛圈、媒體對社會嘅影響力,慶幸自己趕得上黃金盛世嘅尾班車。

-----------------------
留言小教學 (不用註冊):
1. 在下方留言格內輸入留言
2. 在 'Comment as:' 一格內揀選 'Name/URL',小視窗隨即彈出
3. 在 'Name' 一格內輸入你的稱呼,'URL' 一格漏空,再按 'Continue'
4. 按 'Publish' 送出留言
-----------------------

June 22, 2018

[1996] 阿金 (演出 鄒靜)


可能大家會奇怪點解明明年尾先上但我又講咗呢套由楊紫瓊、洪金寶、黃家諾、張家輝主演嘅電影 <阿金> 先,其實呢套計落應該係同 <浪漫風暴> 差唔多時間開拍 (95年尾,又有洪),不過楊於拍攝途中不幸遇意外受重傷入院所以先推遲放映日期。


故事講述打女武師楊邂逅有米才俊黃,為愛情甘願做小女人退下火線返深圳幫愛郎打理卡拉OK生意,但本身兩個已經唔多襯仲要聚少離多結果漸漸被當咕喱阿四,最捅心嘅莫過於喺仇家酒吧入面親眼睇住黃偷食 '江湖純情夜之女' 阿靜 (諷刺嘅係黃之前都係用同樣方法借漫畫封面嚟溝自己),只能忍痛分手,但之後比黑幫追殺走佬嗰陣又犯賤借啲意上人屋企借廁所沖涼,升呢做女主人嘅阿靜以正印姿態笑住比衫佢換。

-----------------------
留言小教學 (不用註冊):
1. 在下方留言格內輸入留言
2. 在 'Comment as:' 一格內揀選 'Name/URL',小視窗隨即彈出
3. 在 'Name' 一格內輸入你的稱呼,'URL' 一格漏空,再按 'Continue'
4. 按 'Publish' 送出留言
-----------------------

June 3, 2018

[1996] 浪漫風暴 (鄒靜 飾 大哥女友)


踏入96年,正式約滿大台 (詳情留意日後篇章) 嘅阿靜開始隻身去闖呢條崎嶇難行嘅演藝路,雖然都仲有唔少影視作品出街,但好多都係上一年拍落,好似年頭上映嘅呢套由郭富城、李若彤、洪金寶、唐文龍主演嘅 <浪漫風暴>


今次阿靜飾演大佬谷德昭嘅WET妹女伴,負責入場陪睇拳賽做吓無知港女 (嘩呢兩個MK駁髮LOOK完全係SAMMI <十誡> 嗰期個IMAGE哈哈)。


由新人賽睇到最後一幕嘅金腰帶王者賽,全場觀眾即刻SET行頭著到勁DECENT撐拳王城城。

-----------------------
留言小教學 (不用註冊):
1. 在下方留言格內輸入留言
2. 在 'Comment as:' 一格內揀選 'Name/URL',小視窗隨即彈出
3. 在 'Name' 一格內輸入你的稱呼,'URL' 一格漏空,再按 'Continue'
4. 按 'Publish' 送出留言
-----------------------

May 22, 2018

[1995] 刑事偵緝檔案II (鄒靜 飾 方昭惠)


我返嚟啦! 趁住近排重播等我又講返呢套由陶大宇、郭可盈、郭藹明、梁榮忠主演嘅經典大劇 <刑事偵緝檔案II> 先,上次提過阿靜95年出街嘅幾個劇集皆舊瓶新酒,而今次阿靜個單元嘅劇情直頭係三年前 <壹號皇庭> 嘅倒模 (仲要一樣有陶大宇同蘇杏璇哈哈),不過唔同嘅係阿靜嘅演技日漸成熟有推進有層次,要靈動有靈動,要崩潰有崩潰,令到呢套哎呀告別作 (應該係完約前接嘅最後一套劇?) 成為阿靜嘅又一代表作。


故事講述警方喺西貢發現一副埋咗超過七年嘅骸骨,懷疑村民方傑遭謀殺棄屍,查案期間發現法醫官麥包不但隱瞞同方嘅繼父子關係,更偷走其人頭模型有意斷去線索,而提到親生阿媽羅蘭更黑面封嘴兼落閘,但當陶同郭越查越多之際,麥居然急急腳自首認罪,話因細妹七年前被方逼到離家出走跳海自盡而心生怨恨起殺機......


陶死心不息認定麥有不可告人嘅秘密,終於查到佢七年前開始每月匯款去療養院照顧一名神秘女子阿靜,原來阿靜就係麥聲稱已去世嘅親妹,而當阿靜得知麥被起訴收押,即偷走出院向警方坦白,默默道出一個七年前嘅倫常悲劇......


話說七年前羅結識第二春方,皇帝女阿靜第一眼已經對佢零好感,家庭日仲全程當人透明,後得阿哥苦心相勸先半推半就接受佢做新爹哋。


有日阿靜放學返房 (呢個髮形既適合扮學生妹又啱做返自己,其實好靚),點知一擰轉身就見到方裝自己換衫,小辣椒阿靜天不怕地不怕,一腳隊落方個祠堂度,仲一心諗住等羅同麥返嚟當面拆穿佢副假面具。


刁蠻任性慣嘅阿靜聰明一世其實蠢過豬頭柄,千算萬算算漏阿媽恨佬恨到發燒,方一招以退為進扮搬走分手,羅即調轉槍頭車巴阿靜 (上面呢幾個表情做得唔錯之餘又保持到靚樣,好掂),無諗過形勢大逆轉劇情大暴走嘅阿靜憤然離家出走。


原本阿靜計劃第二日趁屋企無人再返去執幾件衫走 (好正,一個學生妹拎個LV旅行袋走難),奈何都係敵唔過第二次嘅魔掌,阿靜雖已拼命反抗掙扎,但方一嘢質佢個頭落牆,不省人事嘅阿靜只能任人魚肉......


嗱係咪同 <壹號皇庭> 一模一樣先? 好似完全為阿靜度身訂造咁! 不過今次除咗阿靜自身演技有所提升,整個畫面描述亦比當年去得更盡,睇吓張床夠膽死整埋啲血,阿靜又識得掩住嗌痛,對比過就知三年前係幾咁含蓄同保守哈哈。


唔使問都知阿靜同上次一樣有仇報仇,要一刀插入老豆心啦哈哈。


結果阿靜因為受驚過度斷晒片而被送去聖堂休養,而自責內疚到爆嘅麥為咗補償決定幫阿妹埋屍兼頂罪......


最終阿靜因無足夠殺人證據而被判無罪釋放 (上次好乖有坐到監架哈哈),七年無見嘅母女喺口供室外情深相擁一攬泯恩仇,阿女無事阿仔又結婚,一家人雙喜臨門甜甜蜜蜜唔再分開 (啱啱拍完 <真情> 咁快又同郭可盈同場哈哈),以下係收集返嚟嘅劇照同花絮剪報:


photo credit: 彌敦道人與車@weibo (12, 14 of 14)

-----------------------
留言小教學 (不用註冊):
1. 在下方留言格內輸入留言
2. 在 'Comment as:' 一格內揀選 'Name/URL',小視窗隨即彈出
3. 在 'Name' 一格內輸入你的稱呼,'URL' 一格漏空,再按 'Continue'
4. 按 'Publish' 送出留言
-----------------------