阿靜入行三年終於圓夢，推出首支個人主打 我愛夏日長 展開歌唱事業，其實早喺92年尾因葵已幫阿靜師姐甄楚倩填咗隻 一生放暑假，我絕對相信 我愛夏日長 係呢首歌嘅延續，喺度當然要大讚蘇德華大師嘅精心製作啦，一開始懶洋洋好似進入一個仙境／夢幻國度咁，跟住個節奏同情緒不斷加快升高，最尾慢慢FADE OUT，感覺就好似去咗沙灘另一邊繼續玩繼續唱咁好有層次，再配合埋因葵嘅詞，成功幫阿靜塑造一個活力四射嘅夏日少女形象。
至於電視MV就由陳龍華導演執導，可見備受力捧，開頭先嚟幾個好有FEEL嘅黑白MONTAGE SHOTS。
夏日快歌當然要去沙灘取景啦，阿靜同成班壯男DANCERS撥水鬥玩，濕身狂跳一番。
公司真係算重視首歌，肯BOOK埋室內泳池繼續拍攝，片段所見阿靜把頭髮時而紮高時而孖辮，又沙灘褲又露腰咁，打扮一啲都唔過時。
睇吓阿靜幾放，比人任抬任椗都無SAY NO，仲不停自HIGH添。
派歌又點可以唔去 <勁歌金曲> 唱吓LIVE宣傳吓先，五月尾阿靜就上過一次，開場嗰陣導演要班歌星扮綵排，阿靜清唱咗兩句 '溶解我 溶解我' 之後就扮鬼扮馬話唔排啦要去隔離廠八吓港姐綵排。
之後嘅遊戲時間，睇到嘉賓陣容有林憶蓮、湯寶如、<情陷特區> 嘅 '舊相好' 呂方，同埋接近家駒出事前嘅BEYOND，由於仲係新人，阿靜無機會玩遊戲，只有喺隔離陪笑同拍手，至於打扮就跟返當時嘅打歌服 (沙灘水手裝)，同湯記嗰套都幾夾呀。
初初以為個歌名喺好多人心目中夠絕核夠西 (有心者請自行GOOGLE)，所以到今時今日大家都仲記得 我愛夏日長，但原來當年派台嘅成績比我想像中好得多，先拎咗勁爆榜冠軍歌 (詳情留意下期剪報)，再連續成為兩季季選嘅候選歌，新人有咁嘅成績真係好唔錯!
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
