等咗咁耐終於講到94年啦，真係好鍾意94年嘅阿靜 (同成個樂壇)，無論歌、視、主持、形象都有好大嘅改變同進步，亦都繼續有唔少嘅曝光，就好似年頭咁阿靜已經開始展開密集嘅主持活動，講緊嘅就係呢個同黃霑、江欣燕一齊主持嘅經典歷史問答遊戲節目 <江山如此多FUN(第一輯)>。
一如以往，我諗監製 (甚至係霑叔) 都係睇中阿靜嘅內地背景同文藝氣質而比機會佢，不過喺第一輯入面其實阿靜並唔係集集都有份主持，多數係同另一位港姐主持劉飛飛輪流互換 (應該馬浚偉同鍾漢良嗰邊都係咁)，唔知係咪做得好嘅關係，阿靜同馬喺第二輯先真正坐正成為固定副主持 (詳情留意日後篇章)。
以上片段所見其中一集撞正農曆新年，阿靜幾個都特登著晒古裝拜年，喺度再補張當年官方群星賀年照先，恭喜恭喜! (阿靜成個玉女咁款，好靚)
不過第一輯嘅資源實在太少，搵到有阿靜嘅暫時只有兩集 (第二輯小弟較齊)，片段所見，阿靜嘅頭髮又唔同咗，仲留咗陰，現代感重咗。
一年容易又新春當然唔少得去吓春茗啦，阿靜呢日就孖住大前輩許冠英同師兄鄭梓浩以旗下歌手身份出席寶麗金新藝寶呢個大家庭嘅春茗鋤吓D，見到佢個大哥大嗎?
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
做咗歌手之後阿靜似乎好忙，下面呢個由朱慧珊主持嘅靈異節目 <不可思議星期二> 係我暫時能夠搵到阿靜同年拍落嘅一個短劇。
今次阿靜參演 <驚夢> 呢個單元，故事講述賭鬼曾航生賭馬輸淨兩舊水，路經睇相佬想知自己究竟幾時先發達，神算子同佢講凌晨十二點前會有一個大劫，如果過到就大財到手，不過就要損失好多嘢，點知轉個頭真係比佢喺條街度執到一大袋金銀珠寶，返到屋企仲呃老婆阿靜話只係污糟衫褲，阿靜梗係唔信啦，死都要打開嚟睇。
阿靜窮得有骨氣 (好正，佢地兩個都刻意著啲素色恤衫扮寒酸)，叫曾快啲拎走不明來歷嘅財物，仲想報警。
點知 '物主' 原來一路跟蹤住曾到屋企，阿靜一打開門就比佢勒住，要曾一手交金，一手還返阿靜 (左下圖睇阿靜幾咁辛苦CHOK個玉女驚驚樣出嚟哈哈)。
金係還咗，而阿靜亦即刻彈開，但曾唔甘心拎起個酒壺一嘢哼落個賊度，佢即刻反擊諗住一嘢拮死曾，點知阿靜呢個好老婆二話不說撲過去捱咗嗰一刀。
曾即刻抱住奄奄一息嘅阿靜趕去醫院。
曾後悔不已之際先醒悟原來要失去嘅就係自己最心愛嘅老婆，於是佢趕返去搵神算子希望救得返阿靜，點知去到先知原來佢已經死咗成半個月...... 結果阿靜返魂乏術。睇到呢度，你可能會問咁都叫過咗個劫呀，咁筆終極大財究竟喺邊呢? 無錯，就係阿靜嗰一百五十萬死亡保險金。
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
阿靜派歌出碟期間咁好有新劇配合? 原來係又一倉底貨重見天日，講緊嘅就係由鄭伊健、羅慧娟、尹揚明、彭家麗主演嘅 <金蛇郎君>。
今次阿靜出現喺最後一集，故事講到尹同羅拜堂成親，但羅受盡悲痛變得瘋癲痴呆，仲承認心入面一直只有鄭一個，尹一怒之下走去怡香院搵姑娘洩憤，但當然彈三彈四無個睇得上眼，就連傾倒一眾達官貴人嘅台柱阿靜都比佢連番侮辱，話只要月半彎 (羅) 唔要月圓 (靜)。
阿靜無癮擰轉身想走，點知尹忽然發癲斬人 (阿靜交足表情，值得一讚!)，最後成個怡香院比佢斬清光。
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
年齡相約、同於內地成長、同拜戴思聰老師學唱歌、同入新藝寶做歌星...... 呢一切一切自然令阿靜同阿菲扯上關係，但其實阿靜有王無嘅一面，至少我未見過王行活潑青春少女偶像路線，又未見過王喪跳舞，更加未見過王著泳裝宣傳，公司應該係想包裝阿靜為一個平易近人啲、偶像派啲嘅王，而阿靜嘅處女唱片亦似乎係呢次實驗嘅試金石。
 |
| CP-0086 (CD/CASSETTE) |
鄒靜
唱片封套內頁繼續貫徹夏日形象去沙灘取景，由張文華老師拍攝，ZING老師化妝，力捧程度可見一斑，而出嚟嘅效果亦相當唯美，噚仙氣勁到呢，二人應記一功!
全碟快慢歌四六分帳都算平均，先講慢歌，徐日勤老師獻上兩首精彩作品，先行見面有第二主打 不捨的眷戀，淨係睇個歌名都知係一首典型嘅抒情慢歌，配合潘偉源老師一貫手到拿來嘅深情歌詞同埋中段嘅SAXOPHONE SOLO，作為慢歌主打可謂非常穩陣，而公司更為阿靜度身訂造國語版 情人說改天再見，等佢可以用自己母語唱得更投入。
至於徐老師另一首作品就係 WHERE IS MY LOVE TONIGHT?，呢首嘅曲風同 不捨的眷戀 截然不同，比較墮落迷幻，一開始嘅電結他SOLO已經好有畫面，就好似阿靜喺一個落雨嘅晚上...... 喺一條濕滑嘅公路...... 一邊飲酒一邊揸住架車亂衝亂撞，好有FEEL，亦係碟內小弟喜歡嘅歌曲之一，喺度建議大家同劉玉翠嘅 借多一夜 擺埋一齊聽，兩首都係相同嘅作曲填詞班底，推出時間亦接近，可謂一對姊妹作。
是誰是錯 亦係小弟心水，編曲一開頭好特別，好似啲古裝片唔知去咗邊個山洞度尋幽探秘咁，一句 '空空的斗室有誰夜夜在叫喚 呼出心底愛的不歡' 已經道出成首歌嘅精粹，依舊同 WHERE IS MY LOVE TONIGHT? 一樣好空虛同好寂寞，中間段SAXOPHONE SOLO又再一次帶動情緒，好有嗰種喺空無一人嘅客廳入面自己一個邊喊邊飲悶酒，再自己攬住自己跳舞嘅孤獨感。
講到小弟全碟最鍾意嘅歌曲非 愛火蔓延時 莫屬，呢首係成隻碟入面旋律最好聽，編曲最溫暖甜蜜嘅一首，仲要係由夕爺操刀填詞，難怪放於B1位置。
至於AB兩面嘅結尾歌都不約而同以 '花' 為主題，先嚟第三主打 鏡中花，呢首改編自VIKKI CARR 60年代嘅經典作品 IT MUST BE HIM，好明顯係一首想突顯阿靜古典氣質嘅歌曲，同時亦都好啱做古裝劇嘅主題曲，而根據網上嘅留言，呢首係有排過舞唱過LIVE嘅，不過都係嗰句：無得睇。
做完 鏡中花，阿靜再做 神秘的花，真係夠晒虛幻，公司又再一次揼本請到倫永亮老師作呢首歌比阿靜，編曲亦非常有味道，感覺就好似坐喺長途火車度聽住啲汽笛聲欣賞日落日出咁好舒服，啱晒放喺全碟LAST CUT。
快歌方面，當然唔少得第一主打 我愛夏日長 啦 (更多介紹可到上回篇章)，值得一提嘅係今次隻碟比較少有咁將混音版本 (其實更似EXTENDED VERSION) 擺喺A1位置，原版反而放喺最尾，好似當BONUS TRACK/RADIO EDIT咁，我自己就鍾意聽原版多啲，覺得個編排較為一氣呵成。
B SIDE兩首快歌一聽就FEEL到係鮑比達老師嘅製作：片片雨絲 改編自DIANA ROSS嘅 THE BOSS，而 我會心跳 則COVER DOLLY PARTON嘅 HERE YOU COME AGAIN，兩首都係典型嘅70年代歌舞曲風，好似喺雨中唱歌一樣咁清新舒服，特別鍾意 片片雨絲 一句平實嘅歌詞 '但願台上夜夜就像舊模樣 永遠都相信真摰心一生不變'，不過個人認為呢兩首喺碟內嘅排位如果調轉會聽得比較順。
全碟唯一失色嘅作品要數改編自CHER同名歌曲嘅 BANG BANG，本身編曲跟足佢88年重新錄製嘅ROCK版，好明顯監製係想比阿靜挑戰一首勁爆ROCK歌，可惜事與願違，無錯阿靜啲音係上到，但完全唔係嗌爆ROCK爆嗰種，編曲又唔夠RAW，再加上本身廣東歌詞好硬一粒粒咁，令到成件事更加夾硬，最恐怖嘅就係由頭到尾加插大量搖鈴聲，OVERALL就好似打咗場齋咁，我唔明點解監製唔肯換歌。
總括阿靜首張唱片選曲平衡，快慢兼備之餘曲風亦多元化，歌詞行間打造嘅形象大路且容易受落，條路開得唔錯，以下係阿靜出碟後嘅一個雜誌訪問，喺度照舊打晒出嚟希望大家更了解阿靜：
鄒靜——自言是悶人
鄒靜三年前考入無線藝員訓練班，成為電視藝員，機緣巧合之際拜戴思聰老師學習歌藝，繼而踏入樂壇，今年推出了首張個人大碟。
阿靜直言自己是一名幸運兒。
「沒甚麼開心得過能夠做到自己喜歡做的事，而且還可以發展為事業，自小已喜愛唱歌，而且娛樂圈競爭那麼大，不是人人有這樣的機會，感到很幸運及滿足。」
推出首張大碟時，有甚麼感覺?
「沒有太大感覺，十分奇怪，我也不知怎樣說，當然，始終都是第一次，有很多地方不足，還有待改善，如錄第十首歌時，再聽回第一首，已覺得差好遠，但又不可能重頭再錄過，所以，只期望下一張大碟會比上一張好已十分高興。」
有擔心過出來的成績，樂迷未能接受嗎?
「老實說，或多或少也有點擔心，但不想給予自己太大壓力，只要做好本份，盡力去唱好每首歌，其他也不會想太多，而且也控制不了的。」
談話間發現阿靜沒有甚麼話說的，為甚麼?
「我是一個幾難去表達自己的人，亦有少許情緒化，開心時會有很多話說，相反地，不開心便會少說話，基本上我是幾悶的。」
那麼，妳屬於哪類性格的人?
「有些時候也幾執著自己的決定，自己的一套十分強烈，不容易被別人說服及接受別人的意見，除非自己清楚知道真的不能做到我所訂下的目標：如做運動，我自細到大也不能做過量運動的，前陣子本想跑步練氣兼鍛鍊身體，但跑了十五分鐘後，已無法繼續，就這樣視乎能力範圍去做。」
我好奇地問：「不能做運動，也能keep得那麼fit，有甚麼妙計呢?」
「其實我本身也是屬於肥的，尤其是上鏡更加明顯，只好食少些吧!」
阿靜現正忙於拍攝電視劇，飾演張智霖的其中一位親密女人，也開始其歌視兩棲的娛樂圈生涯。
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
