電視台就如工廠，好多劇集都會撞橋，成日都有港佬北上有外遇嘅情節，只係睇配啲咩人去做，上次 <情陷特區> 阿靜做狐狸精搶晒鏡，今次呢套由關禮傑、劉美君、陳嘉輝、袁詠儀主演嘅 <我為錢狂> 故事橋段相近，但物是人非，阿靜跌返落做陪襯，但唔使做啲唔討好嘅角色，又未嘗唔係一件好事。
今次阿靜飾演東莞製衣廠嘅車衣女工，專門負責吞泡、黐餐同逗獎金，而飾演副廠長嘅李國麟就比純情女工陳慧儀所迷倒，拋棄強勢又功利嘅香港老婆劉美君，橋段同 <情陷特區> 大同小異。
八婆角色邊個未做過，得閒同羅雪玲你串我一句肥妹，我敬返你一句姣婆，HEA吓笑吓又一日。
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
一不離二，大量長髮靚女角色等緊阿靜接收，包括呢套由許志安、劉錫明、關寶慧、甄楚倩主演嘅 <重案傳真>。
故事講到癲佬吳剛為咗報復陳珮珊同彭峻輝拍拖，於是冒充彭打劫珠寶工場，仲將珠寶同炸彈放喺電視城度，而阿靜呢就係電視台嘅靚靚公關，負責拎住個大聲公做導遊接待參觀電視城嘅團友，至於警方就混入其中希望捉到假扮娛賓小丑嘅吳。
搞笑在後頭，本身阿靜帶緊班訪客遊覽古裝街，點知一個唔該比個雜技男放道具蜥蝪上膊頭，嚇到佢花容失色兼高八度尖叫哈哈。
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
留返長髮之後阿靜多咗機會接啲花瓶靚女角色，可以話係佢92年嘅一大轉型，就好似呢套由梁家仁、吕方、杜德偉、江欣燕主演嘅 <反斗威龍> 咁，就飾演一名靚靚花店老闆娘。
話說梁去花店諗住買 '含苞待放' 比女友馮敏清慶祝生日 (阿靜又同馮撞劇啦哈哈!)，乘機撩吓阿靜呢個老闆娘幾句，臨走時佢地兩個好搞嘢喺度大俠式互拜，我覺得似係梁爆肚加落去嘅，可能諗住特別啲無咁悶，阿靜反應又幾快喎即刻接到拜埋一份，但都不忘講返自己本身句對白 '拜拜'，無驚無險成功出鏡一分鐘。
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
有睇開之前篇章嘅可能會留意到阿靜同梁藝齡成日都入同一個劇組，好似 <怒海孤鴻> 同 <老友鬼鬼> 咁，最搞笑嘅係梁次次都要被逼做小姐，而今次呢套由杜琪峯大導演執導，郭晉安、梁藝齡主演嘅電視電影 <共闖天涯> 亦都唔例外。
喺戲入面梁表面上係小姐同大家姐但其實係臥底，而阿靜就做佢隔離嗰班飛女姊妹，負責喺差館入面大吵大鬧撩交嗌同大呼小叫嗌 '玲姐'，值得留意嘅係片中所見梁嘅頭髮越剪越短，而阿靜把頭髮就越留越長，睇嚟阿靜行靚女路線指日可待!
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
同Sam哥做對手戲可能係而家唔少演員可遇不可求嘅夢想，之前 <三八佳人> 、<灰網> 到 <卡拉屋企> 一路都無機會同場，今次阿靜終於有機會接拍呢套由吳鎮宇、林文龍、邵美琪、黎姿主演嘅92年頭炮大劇 <龍的天空>，跟Sam哥學嘢。
故事講到吳喺大陸落嚟香港酒店實習，而著到成個村姑咁款嘅阿靜就同佢地幾個麻甩佬一齊落嚟集訓，叫做有個女仔戥返勻無咁寡。一個二個大鄉里出城見到山頂咁靚咁多高樓大廈O晒咀，仲要忍唔住坐喺酒店大堂樓梯影相留念，結果比啲香港客笑佢地阿燦阻住晒。
另一幕阿靜呻話上面工時無咁長，而家做到好攰，但一講起買衫又即刻幻想自己好似梅姐同紅姑咁，夢幻少女樣出晒嚟。
佢地仲爭取時間去天光墟shopping，懵豬阿靜燸多穫問老細收唔收人民幣，人地一句撻埋嚟話97先好拎貨，臨走前仲嗲經理話上面無朱古力食唔捨得走添!
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
唔覺唔覺阿靜都出咗鏡成年啦，佢最後一套喺91年首播嘅劇集應該係由溫兆倫、張衛健、梁藝齡、李婉華主演嘅 <老友鬼鬼>。
故事講到電影公司老闆吳啟明玩厭咗阿靜呢個哎呀姐仔想撇佢，靜媽唔忿氣上公司搵吳講數要錢，吳嬲爆即刻拖埋郭政鴻走去片場搵拍緊結婚戲嘅阿靜，諗住比啲顏色佢睇叫佢發夢唔好咁早。
陰公豬到爆嘅阿靜先比吳搣爆塊面，再比人一腳伸落地下，細心一睇原來係飾演吳父嘅胡楓，不滿阿仔玩女人玩大咗既修哥拳打腳踢到阿靜塊面瘀晒，仲同佢講唔使旨意拎到一個仙，又叫導演即刻停拍套戲封殺佢。
上次講過拍劇好玩在就算演員一樣，角色關係唔同已經令成件事唔同晒，明明上次 <怒海孤鴻> 阿靜同修哥父慈女孝，仲一齊接濟離家出走嘅吳，今次兩條佬就父子齊心打阿靜，真係好好笑!
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
由 <BEYOND放暑假> 到 <橫財三千萬> 再到 <大家族>，阿靜演OL角色可以話係駕輕就熟，所以呢套由吳鎮宇、李婉華、盧宛茵、鄭敬基主演嘅處境喜劇 <卡拉屋企> 都唔例外，又有得做個靚靚OL。
今次阿靜喺 <財散人安樂> 單元入面做一名地產經紀，故事講到佢同歐陽震華幾個同事一齊去飲茶，不過唔記得帶銀包想叫波比出住先，好衰唔衰人地隻老虎乸一早扣起晒佢啲錢，附屬卡又唔比碌，喺班女同事面前失晒威燸到喊。
點知轉個頭波比買馬贏返晒啲錢，呢餐仲懶闊佬咁叫咗二千幾蚊餸，當阿靜幾個以為又中伏之際，佢就好威威咁隊啲銀紙出嚟埋單，阿靜佢地即刻當波比神咁拜。
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
重頭台慶劇少不免SELL大堆頭大氣派，所以阿靜又有機會撈返一頭半個角色，講緊嘅就係呢套由萬梓良、恬妞、李美鳳、劉錫明主演嘅 <大家族>。
今次阿靜飾演大行秘書，經常喺開會/記招/祝酒情節入面傍喺老細萬同曾江隔離陪笑，但都要交足戲架，唔只衫換過好幾套，又要好似第一幅圖咁扮開會好悶。
另一幕阿靜同成班主角同事去沙灘聯誼一番，因為係大劇同埋仲係新人，阿靜成日匿喺後面同側邊，算安守本份。
結局離唔開紅白二事，阿靜當然有份戥腳出席啦，一如以往都係安份守己咁坐最尾同企後排，片段所見佢仲特登梳起啲頭髮扮成熟莊重，好少可架!
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
內地背景令阿靜散發出獨有嘅古典氣質，上次 <蜀山奇俠之仙侶奇緣> 淨係做妹仔點夠架，所以呢套由關禮傑、周慧敏主演嘅電視電影 <血染黎明> 就再比佢發揮啦。
故事發生喺甲午時期嘅中國，阿靜一如以往做過鏡演員，飾演一名歌女，喺一片愁雲慘霧嘅街頭下賣唱。片中所見阿靜外型稱職，唱歌對嘴亦算認真。不過當唔係影佢大頭嗰陣，佢唔唱歌淨係掃個琵琶，唔知係咪因為比成班麻甩佬望住晒太尷尬定真係仲新無經驗，睇得出佢有啲不知所措同埋忍笑忍得好辛苦咁，夠晒蝦碌!
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
密食當三番，阿靜好努力咁有劇就接，咩角色咩形象都肯做，好似呢套由溫兆倫、吳鎮宇、陶大宇、鄧萃雯主演嘅 <灰網> 咁，就做個吸毒老泥妹。
今次阿靜繼 <浪族闊少爺> 後再次同馮敏清合作做好姊妹，不過就由有錢女變咗做死飛女，飾演姚正菁身邊嘅損友 (睇左下圖兩個染晒紅色HIGHLIGHT又o趙晒香口膠咁，MK味重到呢哈哈)，故事講到佢地陪姚呢個o靚模去尖東海旁接JOB影相，仲做晒花生友係咁引佢收男拍擋陳嘉輝做兵，點知人地讀書又叻又高竇，全程無視呢三件卡啦蘇。
姚主動出擊窮追猛打，但陳始終眼尾都唔肯睄佢一眼，阿靜兩隻魔鬼乘機塞啲 '好嘢' 比姚歎吓等佢HAPPY返，鏡頭一轉已經喺隧道入面濕晒身HIGH到癲咗......
近日好開心見到有人貼咗呢度去討論區，亦都多咗朋友留言同埋轉發，令到我喺枯燥沉悶嘅上班生活入面搵返些少慰藉同滿足感，亦都令我多咗動力去搵阿靜嘅一切，喺度想多謝入嚟睇過嘅每一位，亦都多謝大家同我一樣無忘記鄒靜呢個人，呢度係絕對歡迎有心人分享阿靜以前同而家嘅消息，有咩即管講!
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
公司捧人係有一手，阿靜真係成個暑假都無消失過，同期又有呢套由夏雨、藍潔瑛、歐陽震華、張鳳妮主演嘅 <橫財三千萬>。
今次阿靜飾演一名保險sales，做夏嘅同事，主要喺office戲入面講吓笑吓咁。做保險要見人，阿靜嘅服裝即刻有得執執，OL look都唔錯。但唔知自己係咪睇慣夏做人老豆，實在唔慣佢要做打工仔同啲後生做同事仲要刻意埋佢地堆。
有一幕成班同事去飲茶，諗住夾錢買六合彩望發達，做細嘅阿靜被安排出去拎點心，都好嘅，出出入入斟吓茶食舊春卷都叫做多個機會搶吓鏡。
最後講到佢地以為中咗六合彩 (叻喎爭到頭位衝入去搶張飛)，點知原來佢地之前倒瀉茶搞到啲字化晒，夏根本無跟大家噏嗰啲冧把去買，結果空歡喜一場，成班即刻黑面頹爆。
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
做演員最好玩嘅就係可以玩唔同嘅角色性格，上次 <怒海孤鴻> 做完乖乖學生妹，同一時間疊住嘅呢套由陳秀雯、呂方、關寶慧、黎耀祥主演嘅 <情陷特區>，阿靜180度大變，飾演一個攻心計嘅大陸女工，可以話係佢91年嘅代表作。
套劇叫 <情陷特區>，初初先入為主以為係講香港，原來係指深圳特區。阿靜嘅戲份主要集中喺後半部份，講到呂方受上司賞識上深圳做工廠經理，但人生路不熟又唔識普通話，仲要同班工人合宿。喺呢個時候，身為工廠小職員嘅阿靜已經蠢蠢欲動，密謀上位......
呂一到埗，阿靜已經同佢吹晒水，又幫佢翻譯博好感 (個角色好似為阿靜度身訂造咁，又內地又普通話)。機會終於嚟啦，呂請私人秘書! 阿靜於是進一步做嘢......
阿靜步步為營、不斷獻媚，宵夜熨衫揼骨乜都齊，林滋滋嘅呂當然受晒啦，終於升佢做私人秘書，比佢發圍坐正。
為咗進一步鞏固自己嘅地位，阿靜不惜犧牲色相，主動獻身! 阿靜聰明，搞關係只為工作，唔係真係想比呂包，完全唔想比人知，所以每次都好小心，仲會執走晒房入面啲私人物品。
呂一方面唔知點算好但又好回味成日心思思想敲人門，反而阿靜就忽冷忽熱食住佢。純情呂方比鬼迷，仲將老婆關寶慧送比佢條鍊轉送比阿靜，阿靜仲要嫌cheap話要比返錢佢，完全處於上位。
其實關一早已經唔想呂上去，因為實知佢受唔住誘惑，仲要大住個肚特別多疑，最後都係忍唔住殺上去check，一check就斷到正一正，點知阿靜反轉豬肚，笑佢上嚟做小丑娛賓，燸到上心口嘅呂咁都唔知衰仲趕關走，關傷心欲絕返香港密謀喺湯水度落毒，等呂返嚟毒死佢，但當然最後良心發現打爛碗湯啦，其他後話唔多講。
阿靜東窗事發，為免招人話柄，自己調去會計部，難為呂唔知醜仲難捨難離想佢留低，阿靜頭也不回。
其實套劇最搞笑嘅係，幾個月前關同阿靜喺 <三八佳人> 入面做八婆好姊妹一齊打牌，但今次一個做師奶一個做狐狸精，形象完全變晒仲要打大交哈哈。
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
一浪接一浪，阿靜好快就有機會做啲有名有姓嘅正規角色，好似今次要講嘅呢套由林文龍、劉錫明、梁藝齡、黎姿主演嘅 <怒海孤鴻> 咁。
今次阿靜飾演修哥胡楓同南紅個寶貝女，接濟一眾喺上面落嚟嘅遠房親戚主角 (好好笑，廣東話都未講得正反而要佢扮香港人哈哈)，好多日常生活情節都係以佢屋企為基地，所以都叫做由頭帶到落尾，而阿靜亦做好本份，所有誇張大笑伸脷得意嘅學生妹表情全部交足，最神奇嘅係一個新人已經有服裝贊助，既然係咁我就集中講吓佢啲 '靚衫' 先。
打頭陣校服LOOK：但其實點解套套劇都要講到啲仔女個個無心向學/淨係識得睇電視/一提起玩就精神，不過咁又係嘅，如果唔係又真係無乜嘢好講。
睡衣LOOK：同梁SHARE上下格床，好多閨房心事戲自然預埋阿靜一份，聽吓電台攬吓公仔望吓阿LAM張海報開開心心又一日。
屋企LOOK：都係啲普普通通嘅純色TEE，不過嗰件哈哈笑衫真係笑咗。
出街LOOK：呢兩件叫做有返啲款，不過就著到好老積咁，仲要攝衫配牛褲/白褲，無計，興嘛。
最後一集講到劉壞事做盡，仲趁夜深潛入阿靜屋企搶林同黎個孽種諗住標參索錢，幾個醒晒同佢死過但當然搞唔掂啦，仲要本身煲緊水無熄到煤氣，林又好衰唔衰見無人應門就撳門鐘，結果阿靜一家三口大爆炸慘死，無陰公囉。
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
