諗咗好耐好無寫呢篇，明明係一個非常珍貴嘅歷史性時刻：阿靜同阿菲碰頭合唱! 但結果竟然有黑歷史嘅感覺...... 講緊嘅係呢個由商台舉辦嘅MINI CONCERT <菲胡思亂想音樂會>。
好明顯呢個MINI CONCERT係為咗配合王新碟 <胡思亂想> 嘅宣傳，並為佢年底開鑼嘅處女紅館演唱會做定熱身，而同樣進入新碟宣傳期嘅阿靜就打頭陣做第一個出場嘉賓。
明知只係公司安排旗下藝人做樣，但王依然對阿靜非常殷勤熱情，仲稱佢為 '朋友'，兩個不停自HIGH係咁話好開心，王仲好親切咁提阿靜做FAN SERVICE (有歌迷嗌阿靜架!)，要問吓自己啲粉絲高唔高興鍾唔鍾意，似乎心情唔錯。
吹完水就揀咗隻佢地兩個偶像嘅歌 情人的關懷 嚟唱，王大方讓賽比阿靜唱先，但今次真係要打阿靜一百大板，學佢話齋呢啲歌佢應該熟到無得再熟，但入到副歌唔知發台瘟定點居然又好似上次唱 抵押 咁入錯拍子唱快咗，今次仲要救唔返尷尷尬尬摞歌詞收場，認真抵打 (不過都算好彩，收音聽唔到有人噓)! 接力嘅王從容不逼氣定神閒唱第二段完全KO阿靜，最後一齊合唱，阿靜把聲聽落響啲夠氣啲而王就一貫充滿個人特色嘅慵懶鼻音，其實大家都唔係咁似對方啫。
以為淨係得阿靜一個咁燸，點知其他嘉賓都好似食錯藥咁齊齊失準，話說之後有首係王同蘇永康、邰正宵、歐陽德勛一齊 '友情' 大合唱 THAT'S WHAT FRIENDS ARE FOR (但又要無阿靜份，反而剪報所見佢應該單獨有同蘇合唱，斷估唔係 從不喜歡孤單一個 掛哈哈) 三把男聲就王轉唱女KEY，明明個個實力派但居然搞到拉牛上樹咁完全老貓燒鬚 (但王依舊心情大靚好似真係好ENJOY個SHOW咁......)，究竟嗰日大家發生咩事......
photo credit: 彌敦道人與車@weibo (3 of 6)
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
No comments:
Post a Comment