[1991] 閉門一家千 (鄒靜 飾 輝公司職員)

既然又講返去阿靜嘅新人漏網之魚時期，喺呢套由廖偉雄、鄭伊健、李婉華、劉兆銘主演嘅 <閉門一家千> 入面，阿靜當然都係一貫被分派做佢最拿手嘅OL角色啦!

今次阿靜飾演一名地產公司嘅小職員，主力都係嗰三幅被：開悶會發吽哣、幫VIP歐陽波比通傳、同埋比老細林尚武炳做吓出氣袋咁，不過條裙又幾SHARP喎，圖中所見其他演員都係著啲簡簡單單嘅淨色套裝，反而阿靜出鏡唔多但佢嗰套出奇地有啲款睇吓。

－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－

[1991] 我愛玫瑰園 (演出 鄒靜)

緊接住 <同居三人組>，呢套由袁詠儀、張兆輝、楊羚、雷宇揚主演嘅處境喜劇 <我愛玫瑰園> 繼續見到阿靜 (連埋再之後嘅 <卡拉屋企>，阿靜橫跨91年全年三套SITCOM，勁呀!)，今次阿靜總共出現六集，分別飾演五個唔同嘅角色，認真好使好用。

好快第一集 <邂逅> 已經有阿靜份，孖住趙學而做靚女泳客吸吸睛 (好正呀! 原來佢地喺 <點解香港咁過癮> 之後係有再合作架，好珍貴!)，故事講述張同白彪去長洲渡假，途經沙灘嘅更衣格嗰陣，雷公曳曳拎個望遠鏡出嚟裝入面換緊衫嘅阿靜同而婆，兩個見狀大叫非禮，大飽眼福嘅雷公即刻塞個望遠鏡比張兼夾嗱嗱聲鬆人，慘食死貓嘅張焗住比佢地同路見不平嘅靚靚追打。

阿靜接住喺 <緋聞外的女人> 度戥吓腳做公司職員仔開會，又喺 <’91男歡女愛> 入面扮賣花姑娘SELL雷公買返枝靚玫瑰贈朗拿度夫人林漪娸，不過呢兩集戲份唔多。

要到 <龍鳳俏冤家> 阿靜先再有機會發揮，話說張同袁都想幫各自嘅好友關禮傑同關淑怡箍煲，於是夾計灌醉前者，希望佢可以酒後吐情詩氹返SHIRLEY呢個未婚妻，點知張好衰唔衰搵埋阿靜兩隻兔女郎嚟陪酒，睇到SHIRLEY眼火爆，兩隻衰嘢再趁醉屈關送鑽石鏈，仲猴擒到直接摷佢銀包搶錢，好彩SHIRLEY心軟回頭救人，狠伸阿靜一拳。

嚟到 <膽搏膽> 阿靜就拍住祝文君做個恐怖四眼姑娘，故事講到張要去醫院割膽石 (睇到做醫生嘅係二太蘇恩磁同昌叔陳勉良嗎哈哈)，西口西面嘅阿靜一嘢拮針落個八月十五度，嚇到張走夾唔抖哈哈。

阿靜最後出現嘅單元係 <對不起，我愛你>，而今次終於可以連返戲同祝一齊做返護士啦，但個打扮又連唔晒有少少唔同，畢竟呢集同 <膽搏膽> 已經隔咗成五十集，阿靜中間都唔知開咗幾多套新劇囉哈哈，首先留意到頭髮長咗啦，又貪靚咗唔再戴返上次副眼鏡扮老土扮惡死，睇埋啲面口變到幾咁笑容可掬同和藹可親，而今次要照顧嘅病人亦由張變咗做修哥，唔講唔覺，成個91年入面阿靜同修哥起碼合作咗四次 (<點解香港咁過癮>、<怒海孤鴻> 同 <老友鬼鬼>)，真係好有緣!

－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－

[1991] 同居三人組 (鄒靜 飾 Betty)

新年快樂! 繼續找數補返啲漏網之魚比大家先，第一套係由郭晉安、李國麟、李家聲、商天娥主演嘅處境喜劇 <同居三人組>，呢套出街早過小弟第一篇寫嘅 <幹探群英>，係暫時能夠搵到阿靜最早出鏡嘅劇集 (雖然套劇喺90年已開播，但排到阿靜嘅單元 <靚仔威爆咪> 時正好踏入91年，應該係中途比機會訓練班同學仔加入實習)。

故事講到黃寶欣同隔離男校嘅校草曾航生拍拖，死敵莫燕嫦唔抵得，借意向黃宣戰，誓要贏得校際歌唱大賽挽回面子，為保萬無一失，莫喺選拔賽當日仲搵埋阿靜搞搞震，偷偷加瀉藥落汽水等黃出醜，鵪鶉阿靜唔敢SAY NO，只有掩住良心做幫兇。

點知陰差陽錯下黃莫兩個居然調轉咗罐汽水嚟飲......

結果黃完全無事仲順利進入總決賽，而莫就害人終害己，唱咗幾句 跳舞街 就捧住個肚標返落台 (可惜阿靜當時太新，唔係都可能爭到機會比佢做埋參賽者唱到少少呀)。

決賽將至，雙雙入選嘅黃同曾約埋一齊練歌，黃見仲有成粒鐘就諗住校定鬧鐘喺圖書館邊瞌邊等，莫當然唔會放過呢個機會整熄個鬧鐘等佢失約啦，好彩最終黃得到曾嘅原諒同愛的打氣而贏得總冠軍，莫怒火中燒大鬧阿靜洩憤。

－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－

[1992] 情危夜合花 (演出 鄒靜)

藍潔瑛姐姐嘅離世令人惋惜，但亦因為掀起重播熱潮令我終於有機會睇得返阿靜呢套漏網之作：由藍潔瑛、林其欣、朱潔儀、曾偉權主演嘅電視電影 <情危夜合花>，其實今次都好正，因為應該係阿靜唯一一次做MADAM!

故事講述舞小姐藍成功上岸做名門少奶，卻得悉最親嘅媽媽生李麗麗墮樓慘死，搵私家偵探一查之下發現最大嫌疑嘅竟然係當年嘅好姊妹林，只好忍痛向警方報案，阿靜成班即刻做嘢上門塔人，原本另一個洗底做明星嘅姊妹朱可以幫林做證，但因唔想被翻舊帳斷送星途而決定比假口供，面臨死刑嘅林當場崩潰發癲，阿靜幾個拉返佢入羈留室冷靜 (哈哈上次 <共闖天涯> 阿靜喺差館度叫囂搞事，今次就調返轉要以MADAM身份叫人收聲)。

－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－

[1996] 聊齋之秋月還陽 (下) (鄒靜 飾 春花)

成日都講阿靜嘅形象真係可以好多變，明明都係同一套 <聊齋>，啱啱先喺 <狐仙報恩> 度扮完惡頂衰格大小姐，轉個頭就喺同羅嘉良、俞小凡、陳鴻烈、劉丹合演嘅壓軸單元 <秋月還陽> 入面180度反轉做返個討喜嘅烏龍傻妹仔。

做得羅家嘅賣身婢女，阿靜主力負責打點家中上下事務，尤其對班小少爺小小姐照顧有加，睇吓真係張張圖都攬到佢地實一實架。

阿靜雖然平時論論盡盡食嘢又打爛嘢咁，但其實個底都係醒嘅，唔止識請碟仙，仲幫羅除綠帽，拆穿妖女樊亦敏搵佢做便宜老豆嫁入門嘅奸計，所以都叫做旺主人。

嗱對比上次 <狐仙報恩> 啲面口，睇吓阿靜今次啲表情同笑容幾靚幾純，活潑可愛嘅阿靜終於都返嚟啦!

呢幕大懵阿靜又衰懶訓豬搞到整唔見大少奶林其欣支釵，騰晒雞咁喊住搵神機妙算嘅二少奶余幫佢卜卦搵返出嚟，睇吓佢搵返支釵個樣開心到當正余神咁拜。

余幫咗個咁大嘅忙阿靜當然要喺重要關頭報返恩啦，上面提到樊為嫁唔到入羅家一直懷恨在心，先前已用盡方法阻止情敵余還陽，今次再夾計綁佢到十面尼李麗麗面前施法加害，誓要將佢打回女鬼原形，眼白白睇住少奶比人捉走嘅阿靜第一時間趕返去通報求救，點知去到壇內救余之際慘被艾威嘅飛刀傷及脊骨要永久卧床，不過好人有好報，得林同余悉心照料之下阿靜最終奇蹟地企得返起身行得走得。

哈哈吊咗大家好耐癮，傳說中嘅 '靜敏之交' 剪報終於都出現啦! 等我仲一直以為佢地喺 <佳人有約> (港姐 VS 訓練班) 或者 <勁歌金曲> (主持 VS 歌星) 度已經識，原來都要去到 <聊齋> 咁後期先熟 (不過好可惜佢地喺 <秋月還陽> 入面嘅同框/對手戲剪到近乎無......)，今次訪問仲有提及阿靜嘅音樂動向，原來阿靜一心等97年過台灣發展 (之前更傳已簽藝能動音)，實情係搞到成99年先簽得成公司而最後亦出唔成國語碟，究竟中間發生咗咩事? 等小弟寫到去99年再同大家講啦!

門匙牀鋪俱備　鄒靜免費入住樊亦敏香閏

記得參選港姐期間，樊亦敏和何婉盈曾是一對投契的好姊妹，當時更有一句可歌可泣的經典句語：「三號(樊)同四號(何)永遠都會喺埋一齊!」

不過，經時日洗鍊之下，四號佳麗已換上另一人——看似與Amy風馬牛不相及的鄒靜小姐。消息傳來，鄒靜與樊亦敏的感情甚至好到要住在同一屋簷下，實行展開「新同居時代」。

在未歃血為盟結義金蘭之前，鄒靜先來闡釋因何要與Amy同居一室：「我們不錯是好朋友，有段時間我要搬屋，中間有一個月的真空期，本來我想搬回媽咪家暫住，但Amy說橫豎自己也是一個人住，不如搬來陪陪她吧，後來發覺大家確實好好傾；就算我現在搬走了，Amy也特別買了一張牀，讓我隨時可以到她家過夜。」

她們是如何結緣的? 鄒靜說是拜《聊齋》所賜：「我們一起到武夷山拍外景，得閒沒事做，傾傾吓就變成好朋友。我好鍾意Amy，她對朋友很真，對我亦很關心。」

話說回頭，久違了的她，近況如何? 「我在去年十二月已和TVB滿約了，本來打算到台灣唱歌的，但因為我簽不到台證(她從大陸來港不足七年)，要再過一年才能啟行。」事實上，無線的出手之低，也是她離開的原因。「之前我一直都沒有太多機會，臨走前演的《娛樂插班生》，更是可有可無的角色。雖然他們肯加我四成騷錢，但因為我簽得騷少，一年得六十個，我覺得加極也沒有太大保障，所以便離開了。」

在這段等待黎明的日子，她賴以登台維生：「由滿約到現在，我大概到大陸登台十多次，每次價錢有多有少。好的，去一次唱二、三晚有幾萬元，但如果遇著老闆孤寒些，幾千蚊場都要唱……」她帶笑自嘲：「我又不是什麼巨星，為生活，唯有大小通殺囉!」


不用擔心經濟問題

正因為鄒靜這分「不扮高深，只求搵銀」的性格，令她總算不用擔心經濟問題：「我一向都好節衣縮食，有時一個星期也用不上五百元，而且我又沒有養家負擔，爸爸甚至會間中給錢我用。」登台不用置裝嗎? 「又沒有傳媒採訪，我一件衫可以穿好多次的。」她最大的支出，只是每月萬幾元的屋租，所以她甚至可以儲到個錢，積穀防飢。

樊亦敏眼中的鄒靜，則是個不太圓滑的爽直女孩：「她可以好cool的，不關她事的話，她完全話之你，不過，她其實是個好純的女孩子。」

鄒靜事業出現阻滯，Amy一定有從經濟與精神上雙管齊下支持老友吧? 她略有保留：「大家出來吃飯，誰人埋單這些不用計，最重要是，她有什麼不開心，大可以跑來找我，她連我屋企鎖匙都有!」Amy對鄒靜的信任程度，直可以肝膽相照、義本無言形容之。

Amy不諱言有時即使約了大班朋友吃飯消遣，她也會叫埋鄒靜一塊出來，好讓她認識多些新朋友。有時Amy帶些候選男友讓鄒靜過目，靜妹亦會給予寶貴意見與評語，讓她好好參詳一番。

那麼，Amy的真命天子出現沒有? 她還是那一句：「未落實的事，我不想公開。我想要到我嫁得出，才會公開一切了。」看來，要取得Amy芳心，鄒靜這一關是非過不可，各位要學好「愛屋及烏」之道了。

講真佢地啲合照真係幾養眼，兩個靚得嚟又襯真係好難得，亦都戥佢地開心呢能夠喺圈中搵到好姊妹交心!

photo credit: 彌敦道人與車@weibo (7 of 11)

－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－