踏入96年，正式約滿大台 (詳情留意日後篇章) 嘅阿靜開始隻身去闖呢條崎嶇難行嘅演藝路，雖然都仲有唔少影視作品出街，但好多都係上一年拍落，好似年頭上映嘅呢套由郭富城、李若彤、洪金寶、唐文龍主演嘅 <浪漫風暴>。
今次阿靜飾演大佬谷德昭嘅WET妹女伴，負責入場陪睇拳賽做吓無知港女 (嘩呢兩個MK駁髮LOOK完全係SAMMI <十誡> 嗰期個IMAGE哈哈)。
由新人賽睇到最後一幕嘅金腰帶王者賽，全場觀眾即刻SET行頭著到勁DECENT撐拳王城城。
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
我返嚟啦! 趁住近排重播等我又講返呢套由陶大宇、郭可盈、郭藹明、梁榮忠主演嘅經典大劇 <刑事偵緝檔案II> 先，上次提過阿靜95年出街嘅幾個劇集皆舊瓶新酒，而今次阿靜個單元嘅劇情直頭係三年前 <壹號皇庭> 嘅倒模 (仲要一樣有陶大宇同蘇杏璇哈哈)，不過唔同嘅係阿靜嘅演技日漸成熟有推進有層次，要靈動有靈動，要崩潰有崩潰，令到呢套哎呀告別作 (應該係完約前接嘅最後一套劇?) 成為阿靜嘅又一代表作。
故事講述警方喺西貢發現一副埋咗超過七年嘅骸骨，懷疑村民方傑遭謀殺棄屍，查案期間發現法醫官麥包不但隱瞞同方嘅繼父子關係，更偷走其人頭模型有意斷去線索，而提到親生阿媽羅蘭更黑面封嘴兼落閘，但當陶同郭越查越多之際，麥居然急急腳自首認罪，話因細妹七年前被方逼到離家出走跳海自盡而心生怨恨起殺機......
陶死心不息認定麥有不可告人嘅秘密，終於查到佢七年前開始每月匯款去療養院照顧一名神秘女子阿靜，原來阿靜就係麥聲稱已去世嘅親妹，而當阿靜得知麥被起訴收押，即偷走出院向警方坦白，默默道出一個七年前嘅倫常悲劇......
話說七年前羅結識第二春方，皇帝女阿靜第一眼已經對佢零好感，家庭日仲全程當人透明，後得阿哥苦心相勸先半推半就接受佢做新爹哋。
有日阿靜放學返房 (呢個髮形既適合扮學生妹又啱做返自己，其實好靚)，點知一擰轉身就見到方裝自己換衫，小辣椒阿靜天不怕地不怕，一腳隊落方個祠堂度，仲一心諗住等羅同麥返嚟當面拆穿佢副假面具。
刁蠻任性慣嘅阿靜聰明一世其實蠢過豬頭柄，千算萬算算漏阿媽恨佬恨到發燒，方一招以退為進扮搬走分手，羅即調轉槍頭車巴阿靜 (上面呢幾個表情做得唔錯之餘又保持到靚樣，好掂)，無諗過形勢大逆轉劇情大暴走嘅阿靜憤然離家出走。
原本阿靜計劃第二日趁屋企無人再返去執幾件衫走 (好正，一個學生妹拎個LV旅行袋走難)，奈何都係敵唔過第二次嘅魔掌，阿靜雖已拼命反抗掙扎，但方一嘢質佢個頭落牆，不省人事嘅阿靜只能任人魚肉......
嗱係咪同 <壹號皇庭> 一模一樣先? 好似完全為阿靜度身訂造咁! 不過今次除咗阿靜自身演技有所提升，整個畫面描述亦比當年去得更盡，睇吓張床夠膽死整埋啲血，阿靜又識得掩住嗌痛，對比過就知三年前係幾咁含蓄同保守哈哈。
唔使問都知阿靜同上次一樣有仇報仇，要一刀插入老豆心啦哈哈。
結果阿靜因為受驚過度斷晒片而被送去聖堂休養，而自責內疚到爆嘅麥為咗補償決定幫阿妹埋屍兼頂罪......
最終阿靜因無足夠殺人證據而被判無罪釋放 (上次好乖有坐到監架哈哈)，七年無見嘅母女喺口供室外情深相擁一攬泯恩仇，阿女無事阿仔又結婚，一家人雙喜臨門甜甜蜜蜜唔再分開 (啱啱拍完 <真情> 咁快又同郭可盈同場哈哈！)
嗱嗱嗱用心演出係有回報嘅，公司特別安排阿靜去 <K-100> 拍攝一條兩分鐘嘅片花以重點宣傳佢孭飛嘅呢個單元，片段所見阿靜以賣火柴的女孩造型講述自己喺劇中嘅悲慘故事，真係我見猶憐咯！以下係收集返嚟嘅劇照同花絮剪報：
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
唔好意思呀我呢個懶人真係好耐都無更新啦 (亦希望大家多多支持小弟新開嘅黎駿BLOG)!
講起2017年頭呢幾個月已經有好多開心事發生，好似黃翊上 <流行經典50強> 而人氣急升，連帶埋阿靜都多咗人問起 (如果大家有興趣睇返我介紹佢同阿靜合演嘅MV可以撳返呢度同呢度)，而阿靜嘅好姊妹樊亦敏亦喺呢四個月入面連續上三套新劇而掀起唔少話題同好評，真係好戥佢地高興!
而最驚喜嘅係原來仲有人睇我個BLOG仲花時間留言比我! 多謝靜迷 (其實應該係翊迷?!) CC無私分享以前嘅追星點滴 (有心睇返可撳呢度)，而得到CC嘅同意，決定開呢篇同大家一齊分享阿靜93年頭簽比佢嘅三張珍貴相片，如果大家有任何同阿靜嘅回憶/相片/剪報等等想分享，好歡迎大家隨時留言比我!
呢張睇個獎座應該係92年叱咤頒獎禮慶功宴，公司一眾新人李家明、阿靜、劉彩玉、鄭梓浩齊賀大師姐王靖雯攞大獎 (阿靜早期簽名簽 'JESSICA' 同 '靜'，簽法好似學生簽紀念冊咁好得意，對比94年嘅簽名已經好唔同)。
CC話呢張相係影自當年電台展覽入面唱片公司嘅藝人展品，好靚呀 (枝粉紅色簽名筆好襯張相呀，同埋呢張阿靜簽多咗個 'CHAU')!
呢張係阿靜送比CC嘅，認得呢個LOOK嗎? 喺黃翊 一世濃情 MV入面出現過架! 睇嚟阿靜成日攞呢輯相嚟做沙龍宣傳照喎 (今次簽中文全名，背後仲寫埋祝福語，好有心!)。
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
'95時裝三寶第二擊! 今次阿靜喺廖偉雄、梅小惠、江欣燕、林家棟主演嘅 <娛樂插班生> 入面繼續同上次 <真情> 一樣大放笑彈，飾演一名喺上面落嚟無耐比老細包嘅電視台姐仔 (仲唔係 <老友鬼鬼> 2.0 哈哈!)。
故事講到阿靜請服裝部主管蕭玉燕食宵夜擦吓佢鞋，蕭禮尚往來送返張名店VIP卡過佢，冷不防阿靜一個轉身擺款扮上菜，一臉嫌棄咁話嗰度啲衫CHEAP，蕭即時無癮，鏡頭一轉阿靜同林 (記得佢地新人時期 <笑星救地球(第二輯)> 同 <佳人有約> 入面嘅合作嗎?) 喺化妝間等拍咀戲，林乘機口花花撩阿靜呢個超級發電機，正印陳梅馨喺側邊睇到眼火爆。
呢場講到廖爆大冷爭到新劇男主角做，晴天霹靂嘅林將自己嘅怒火發洩喺同阿靜對稿嘅監獄戲入面，正當導演大讚佢試戲都咁肉緊認真，仲寸阿靜學吓咩叫演員道德之際，林頹爆話要請假走先，阿靜冷笑一聲咩仇都報晒。
另一幕阿靜喺試身室度發晒爛渣，原來今次套新劇佢無份做王妃公主不特止，仲要著埋晒啲宮女舊衫，蕭潤佢話唔抵得咪自己出錢造過套囉，點知阿靜撐到行話好 (睇吓佢左下圖嗰副輸人唔輸陣咀硬不饒人嘅八婆咀臉哈哈)，叫佢整好之後開張單嚟，大把公子哥兒爭住幫佢找數，仲乘機放料話城中富豪戴少民係佢嘅 '好朋友'。
不過戴同佢都係逢場作戲啫，比起有層樓住嘅江仲差幾皮 (記得佢地上年拍住主持 <江山如此多FUN> 嗎?)，但衰在養極唔熟兼服侍不周，結果比人燸CUT附屬卡LIMIT，慘被店員笑到面黃嘅江剷上 '屋企' 搵戴講數，點知人地同緊阿靜喺梳化底度HAPPY緊，戴乘機掟煲兼拎成篋錢掟死佢，衰嘢阿靜加把口話有骨氣就唔好執。
最後講到成班圍威喂匿喺服裝間偷睇隔離台嘅電影頒獎禮直播，一邊指手劃腳評頭品足一邊開盤賭邊個係影帝影后 (好開心呀，等到最尾阿靜終於有得同好姊妹樊亦敏同場啦!)。
下面呢兩張剪報好正，阿靜居然擺咗個一模一樣嘅側身翹手挨牆甫士影相，想話唔係同期影嘅都唔得啦哈哈!
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
新年快樂! 唔好以為阿靜95年淨係得之前介紹嗰四部電影，講返佢老本行電視劇，單係上半年已經投身拍攝長劇 <聊齋>，而下半年更有份參演三套時裝大劇，亦係我最滿意阿靜嘅時期，一嚟自己偏好時裝劇，二嚟我睇到一個升級版嘅阿靜，呢三套劇坦白講只係重覆佢做新人時嘅戲路，但就如我經常所講，浸咗幾年熟能生巧，演技開始得心應手，尤其個眼神同氣場，而今次第一套要考佢牌嘅就係由李司棋、劉丹、黎宣、薛家燕主演嘅經典處境長劇 <真情>。
故事講到蔣志光跟妹夫劉少君上桂林做工廠經理，順便睇實佢唔比佢搞搞震，點知人地一早已經喺上面包咗川菜館女侍應阿靜做二奶成半年有多 (有無諗起 <情陷特區> ?)，一收工就急不及待上香閨依泣，阿靜出晒嗲功又揼骨又焗參茶，咁好服侍，劉梗係包食包住仲送埋部新空調過佢嘆，點知一啖砂糖一啖屎，話呢排會少啲上嚟免蔣起疑，阿靜獨守空房扁晒咀。
佢地兩個表面痴纏煙韌實則各有各滾，原來阿靜之前趁劉唔喺桂林嗰時已經不停拖新仔(水魚)行街，而劉亦借見工為名FLIRT新女秘書，點知阿靜忽然殺上餐廳 '捉姦' (呢個LOOK襯得唔錯呀)，劉反轉豬肚話白撞唔識佢，阿靜監生比經理扯走。
阿靜深深不忿，怒氣沖沖剷上寫字樓搞事爆劉大鑊，再打埋個長途電話恐嚇大婆郭少芸引佢上嚟桂林贈慶，郭中計囉囉攣，借頭借路拉埋大嫂蘇玉華一齊上去。
咁啱二妹郭可盈 (記得佢地 <黃浦傾情> 第一次合作嗎?) 本身亦同馬海倫上桂林傾生意，走嗰陣撞正阿靜同劉攤牌 (全身純色又咁PLAIN好蝦人著架)，梗係乘機匿埋偷聽啦，阿靜七情上面聲淚俱下咁話好愛佢仲要有埋BB唔准佢走，點知劉掟二千蚊比佢落仔話以後各行各路，阿靜㷫過火屎。
阿靜衝入廁所同清潔阿姐呻話條氣頂到上心口，都未掠夠水就半路殺出個小四壞佢好事，臨撇又比劉當燦妹侮辱，嘥晒啲演技同表情，仲話要捕實郭少芸上嚟報仇，匿喺廁格入面嘅郭可盈咩都聽到晒，即刻打電話返去搵阿媽李司棋求救。
終於比阿靜呢隻冤鬼等到佢地齊人食飯，趁郭入廁所補妝嗰陣跟埋入去講數，點知佢同劉一樣掉低二千蚊叫佢過主，阿靜都唔知好嬲定好笑，話唔擺低二萬蚊唔會算數，夠膽行出去就以後唔使要面。
郭睬佢都傻，阿靜火都嚟埋 (右上圖個樣好可愛呀)，把心一橫出去淋劉鏹水諗住一拍兩散，點知蔣白狗當災，仲要為人為到底，肯幫劉食死貓呃郭話係自己偷食惹禍，果然世上只有哥哥好。
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
