又係漏網之魚時間! 最近又搵得返一套阿靜91年嘅電視電影 <魅影迷情>，由方中信、陳淑蘭主演，亦係阿靜第一部 '鬼片' (擺明搞笑/愛情成份居多，全無恐怖)。
故事講述地產經紀方經女鬼蘭子悉心安排下SELL到佢間鬼屋大宅比個大客，保得住份工嘅方同幾個兄弟一齊落夜總會慶祝，而阿靜就係其中一個陪佢地飲酒猜枚嘅小姐。
玩到無嘢好玩，班嘩鬼借飾演方太嘅崔嘉寶過橋，整蠱方話崔會喺鬼屋度等佢，仲乘機跟埋佢入鬼屋探險。喺度想讚燈光打得唔錯，阿靜表情亦好到位，尤其係右下角嗰幅。
忽然一個華麗轉身，見到祝文君匿喺後面扮女鬼，成功嚇到阿靜兩個半死。點知螳螂捕蟬黃雀在後，正當祝自鳴得意之際，真正女鬼屋主蘭子飄到，成班集體尖叫大逃亡。
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
阿靜咁靚女點可以咁嘥料唔扮港姐呢，所以今次呢套由羅嘉良、關秀媚、邵仲衡、劉玉翠主演嘅 <大賭場> 就有機會比佢過吓選美癮。
故事講到素人OL關比攝影師吳剛發掘參選紫荊花小姐，同阿靜幾位佳麗先喺記者招待會入面亮相 (嘩個LOOK完全係早期SAMMI搭林帆)，最終阿靜奪得季軍，喺慶祝酒會度齊齊拎住紮花陪笑影相。
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
喺網上搜尋阿靜，好多時都會出現兩幅民族裝扮嘅造型照，睇嚟睇去應該似係呢套由吳鎮宇、黎美嫻、邵仲衡、朱潔儀主演嘅 <大地飛鷹> 嘅劇照。
今次阿靜出現喺開頭部分，講到哈呢族人開營火聖典，點知比人搗亂搶權仗，尊者李家鼎更加喺交戰之中受傷，阿靜成班哈呢族人即刻喪叫亂跑，好在只有聖女馮敏清先可以用到枝權仗 (嗱都話係阿靜嘅最佳拍擋架啦又孖住出啦)，所以佢地一掂枝權仗唔係爛手就甩頭，馮仲即刻用權仗醫好鼎爺，阿靜成班拍爛手掌。
但睇完成套劇都唔覺阿靜有著過呢套衫出鏡，唔知有冇勁人可以解答到?
後記：感激高手HUNG嘅留言提點，終於知道輯相並唔係出自 <大地飛鷹>，而係94年嘅香港花卉展覽攝影比賽 (原來仲攞咗季軍!)，喺度補多幾張靚剪報比大家：
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
上年阿靜入到大劇 <大家族>，今年同一製作班底開新劇，無驚無險繼續有份，講緊嘅就係由萬梓良、陳玉蓮、林俊賢、陳法蓉主演嘅 <巨人>。
今次阿靜飾演黃靜宜嘅同學，幾個純情學生妹乖乖練習芭蕾舞，而飾演黃哥嘅萬諗住嚟探班，但因為黃好驚萬呢個殺人犯於是尷尷尬尬借頭借路想打發佢走，片段所見阿靜係有啲料到喎，堅拉筋仲一臉輕鬆，個樣又似學生妹，抵導演比機會佢企最近個鏡頭。
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
睇親報道都話阿靜圈中朋友唔多，樊亦敏係佢其中一個好姊妹，睇返呢套由劉嘉玲、陳奕詩、樊亦敏主持嘅女性時尚節目 <佳人有約>，裡面應該係阿靜同AMY第一次碰頭合作，唔知係咪因為咁而FRIEND咗呢?
同 <BEYOND放暑假> 一樣，阿靜主要喺 <女人心> 環節入面做趣劇，真係唔知咁啱定咁橋，阿靜呢集又同 <BEYOND放暑假> 一樣賣衫，招呼樊同扮佢男友嘅嘉賓梁家輝 (好正，有邊個估到四年後阿靜同梁一齊拍 <南京的基督>)，講吓男人陪女人SHOPPING嘅尷尬無癮同DOS AND DON'TS。
另一集分析男人見女方家長時嘅各種醜態，阿靜今次做樊嘅細妹，黐住阿爸阿媽驗吓呢個未來姐夫合唔合格，點知人地見面禮又唔買，又係咁晒自己啲炒股戰績，最後打牌仲要唔識鬆章誅晒三家，阿靜成家黑完面再O咀。
除咗 <女人心>，阿靜喺 <寂寞的心俱樂部> 入面都有份搞吓笑，今次喺呢個 '婦女投訴性騷擾大會' 入面，阿靜同祝文君幾個一齊吹水講吓點樣防狼，佢仲提議帶電棒出街，話預防勝於治療喎哈哈。
另一幕阿靜做林家棟同樊嘅電燈膽，故事講到林不但唔夠細心睇唔到女友打咗耳窿，仲喺班豬朋狗友面前喪落佢面，串佢BBQ食淨晒啲嘢正一大嘥鬼，阿靜喺隔離剝晒花生暗笑。
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
