喺網上搜尋阿靜，好多時都會出現兩幅民族裝扮嘅造型照，睇嚟睇去應該似係呢套由吳鎮宇、黎美嫻、邵仲衡、朱潔儀主演嘅 <大地飛鷹> 嘅劇照。
今次阿靜出現喺開頭部分，講到哈呢族人開營火聖典，點知比人搗亂搶權仗，尊者李家鼎更加喺交戰之中受傷，阿靜成班哈呢族人即刻喪叫亂跑，好在只有聖女馮敏清先可以用到枝權仗 (嗱都話係阿靜嘅最佳拍擋架啦又孖住出啦)，所以佢地一掂枝權仗唔係爛手就甩頭，馮仲即刻用權仗醫好鼎爺，阿靜成班拍爛手掌。
但睇完成套劇都唔覺阿靜有著過呢套衫出鏡，唔知有冇勁人可以解答到?
後記：感激高手HUNG嘅留言提點，終於知道輯相並唔係出自 <大地飛鷹>，而係94年嘅香港花卉展覽攝影比賽 (原來仲攞咗季軍!)，喺度補多幾張靚剪報比大家：
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
上年阿靜入到大劇 <大家族>，今年同一製作班底開新劇，無驚無險繼續有份，講緊嘅就係由萬梓良、陳玉蓮、林俊賢、陳法蓉主演嘅 <巨人>。
今次阿靜飾演黃靜宜嘅同學，幾個純情學生妹乖乖練習芭蕾舞，而飾演黃哥嘅萬諗住嚟探班，但因為黃好驚萬呢個殺人犯於是尷尷尬尬借頭借路想打發佢走，片段所見阿靜係有啲料到喎，堅拉筋仲一臉輕鬆，個樣又似學生妹，抵導演比機會佢企最近個鏡頭。
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
睇親報道都話阿靜圈中朋友唔多，樊亦敏係佢其中一個好姊妹，睇返呢套由劉嘉玲、陳奕詩、樊亦敏主持嘅女性時尚節目 <佳人有約>，裡面應該係阿靜同AMY第一次碰頭合作，唔知係咪因為咁而FRIEND咗呢?
同 <BEYOND放暑假> 一樣，阿靜主要喺 <女人心> 環節入面做趣劇，真係唔知咁啱定咁橋，阿靜呢集又同 <BEYOND放暑假> 一樣賣衫，招呼樊同扮佢男友嘅嘉賓梁家輝 (好正，有邊個估到四年後阿靜同梁一齊拍 <南京的基督>)，講吓男人陪女人SHOPPING嘅尷尬無癮同DOS AND DON'TS。
另一集分析男人見女方家長時嘅各種醜態，阿靜今次做樊嘅細妹，黐住阿爸阿媽驗吓呢個未來姐夫合唔合格，點知人地見面禮又唔買，又係咁晒自己啲炒股戰績，最後打牌仲要唔識鬆章誅晒三家，阿靜成家黑完面再O咀。
除咗 <女人心>，阿靜喺 <寂寞的心俱樂部> 入面都有份搞吓笑，今次喺呢個 '婦女投訴性騷擾大會' 入面，阿靜同祝文君幾個一齊吹水講吓點樣防狼，佢仲提議帶電棒出街，話預防勝於治療喎哈哈。
另一幕阿靜做林家棟同樊嘅電燈膽，故事講到林不但唔夠細心睇唔到女友打咗耳窿，仲喺班豬朋狗友面前喪落佢面，串佢BBQ食淨晒啲嘢正一大嘥鬼，阿靜喺隔離剝晒花生暗笑。
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
近排搵得返兩個阿靜喺91年拍嘅綜藝節目，一個年頭一個年尾 (計埋年中嘅 <笑星救地球(第二輯)> 同 <BEYOND放暑假>，其實阿靜91年淨係variety show都爆得好緊要)，好想趁阿靜生日之際補寫返作為生日禮物! 今次先講由胡楓、蔣志光、陳淑蘭主持嘅經典搞笑節目 <點解香港咁過癮>。
我絕對相信 <點解香港咁過癮> 係阿靜首個出鏡嘅節目，一嚟播出日期早過我最早寫嘅 <幹探群英>，二嚟片尾嘅credit直情無落到阿靜同其他演員嘅名 (直至第8/9集先開始有)，可見呢個節目係比班新人去實習。入面仲有好多熟悉嘅面孔，好多都做到今時今日 (啱啱八點半先見到祝文君，九點半又有麥嘉倫)。
導演好眼光，第一集頭幾幕已經揀晒啲見得吓人嘅出鏡先，幸運兒包括阿靜、趙學而同麥嘉倫。阿靜幾個先玩逼lift，跟住出尖咀shopping，再搭吓地鐵，最後去餐廳撐枱腳，幾多外景出喎!
鏡頭一轉，<行貨修與花仔光> 講去飲。咦咦，又係呢件 <卡拉屋企> / <壹號皇庭> 同款大褸，睇嚟係阿靜套戰衣喎，抵佢霸到個靚位企係蘭子側邊做接待，食飯嗰陣又唔使背住鏡頭。
其實第一集個長髮靚女look真係好珍貴，因為第二集阿靜已經失驚無神變咗短頭髮，我諗極都諗唔明，係其他劇集需要? 比人落order? 定自己決定? 呢個真係一個謎，有無勁人解答到?
第三集講新年 (證明係年頭播啦)，成班嘩鬼落尖咀爭拜年鬥搶鏡。不得了，阿靜成個王靖雯倒模咁。
新年又點少得睇煙花呢，黃色大露背連身短裙再加黑絲，完全係 Everything 時期嘅王，不過都唔夠游飆扮女人咁搶鏡哈哈。
實在好鍾意睇阿靜走走糴糴出外景嘅片段，今集扮鬼扮馬去觀塘、葵盛，再返返九龍塘。
每集臨尾都會好人齊咁唱吓歌數吓白欖嗌吓口號，以前真係好團結好有心又好開心......
剪得短髮，梗係唔可以晒咗佢要扮man啦! 阿靜先同黃文標戴超扮Mark哥，再嚟個霓虹雙妹嘜做大家姐。
我成日都話阿靜咩形象都carry到，話口未完轉個頭又要做返性感姣婆，同麥喺條街度鬥放鬥露，最終麥輸咗，比阿靜電暈。
發電機又出動啦 (今次件衫同 <怒海孤鴻> 同一系列哈哈)，入圖書館電 <行貨修與花仔光>，電到佢地兩個咿嘩鬼叫，仲比蘭子趕出圖書館，笑爆。
其實我好留意阿靜同婆婆呢pair，兩個都係白羊座，兩個都唱歌拍劇做主持，兩個我都好鍾意，理應夾得到，但事實應該無friend過...... 睇呢啲節目見到佢地兩個有時咁啱編埋一齊，自己都會特別開心想睇多啲，好似呢兩幕咁，兩個一齊扮大肚婆再扮喊，真係好珍貴。
<行貨修與花仔光> 今次帶大家去抗議示威 (又著得幾行喎今次)，又係好難得同婆婆兩個孖住行，仲挨埋一齊扮攰添!
另一集扮空姐，講吓飲茶等位、高空擲物同空難，雖然同婆婆同場，但又係各有各做，無乜交流咁。
去到最尾幾集，阿靜主要part住游同羅雪玲。講開 '食死貓' 嗰陣，仲跟大隊一齊扮貓，好盞鬼!
最後一集反而無乜特別又唔多齊腳咁，阿靜婆婆幾個負責撩交嗌同眼超超，最後仲要無大合唱，有啲虎頭蛇尾。
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
雖然我唔識阿靜同馮敏清，但我估當年佢地應該係一齊入訓練班嘅同學仔，如果唔係點會成日孖住拍劇呀，繼 <浪族闊少爺> 嘅千金姊妹花同 <灰網> 嘅飛女雙妹嘜 (其實仲有好多套架，不過唔係同場咁解)，佢地兩個又有機會合作啦，就係今次呢套由關禮傑、李克勤、黎姿、雷宇揚主演嘅 <龍影俠>。
故事講到漢奸方傑同李耀敬夾手夾腳想氹大爺李龍基開礦賣比日本，引鹹濕佬梗係要用美人計啦，於是佢地出動阿靜同馮呢兩位東洋美女作為送比佢嘅 '禮物' (記得阿靜喺 <BEYOND放暑假> 入面都扮過日本姑娘嗎?)，雖然我唔知佢地兩個真實係咩關係，但係咁樣套套劇都可以有個伴一齊出吓鏡其實都幾正呀!
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
