睇親報道都話阿靜圈中朋友唔多，樊亦敏係佢其中一個好姊妹，睇返呢套由劉嘉玲、陳奕詩、樊亦敏主持嘅女性時尚節目 <佳人有約>，裡面應該係阿靜同AMY第一次碰頭合作，唔知係咪因為咁而FRIEND咗呢?
同 <BEYOND放暑假> 一樣，阿靜主要喺 <女人心> 環節入面做趣劇，真係唔知咁啱定咁橋，阿靜呢集又同 <BEYOND放暑假> 一樣賣衫，招呼樊同扮佢男友嘅嘉賓梁家輝 (好正，有邊個估到四年後阿靜同梁一齊拍 <南京的基督>)，講吓男人陪女人SHOPPING嘅尷尬無癮同DOS AND DON'TS。
另一集分析男人見女方家長時嘅各種醜態，阿靜今次做樊嘅細妹，黐住阿爸阿媽驗吓呢個未來姐夫合唔合格，點知人地見面禮又唔買，又係咁晒自己啲炒股戰績，最後打牌仲要唔識鬆章誅晒三家，阿靜成家黑完面再O咀。
除咗 <女人心>，阿靜喺 <寂寞的心俱樂部> 入面都有份搞吓笑，今次喺呢個 '婦女投訴性騷擾大會' 入面，阿靜同祝文君幾個一齊吹水講吓點樣防狼，佢仲提議帶電棒出街，話預防勝於治療喎哈哈。
另一幕阿靜做林家棟同樊嘅電燈膽，故事講到林不但唔夠細心睇唔到女友打咗耳窿，仲喺班豬朋狗友面前喪落佢面，串佢BBQ食淨晒啲嘢正一大嘥鬼，阿靜喺隔離剝晒花生暗笑。
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
近排搵得返兩個阿靜喺91年拍嘅綜藝節目，一個年頭一個年尾 (計埋年中嘅 <笑星救地球(第二輯)> 同 <BEYOND放暑假>，其實阿靜91年淨係variety show都爆得好緊要)，好想趁阿靜生日之際補寫返作為生日禮物! 今次先講由胡楓、蔣志光、陳淑蘭主持嘅經典搞笑節目 <點解香港咁過癮>。
我絕對相信 <點解香港咁過癮> 係阿靜首個出鏡嘅節目，一嚟播出日期早過我最早寫嘅 <幹探群英>，二嚟片尾嘅credit直情無落到阿靜同其他演員嘅名 (直至第8/9集先開始有)，可見呢個節目係比班新人去實習。入面仲有好多熟悉嘅面孔，好多都做到今時今日 (啱啱八點半先見到祝文君，九點半又有麥嘉倫)。
導演好眼光，第一集頭幾幕已經揀晒啲見得吓人嘅出鏡先，幸運兒包括阿靜、趙學而同麥嘉倫。阿靜幾個先玩逼lift，跟住出尖咀shopping，再搭吓地鐵，最後去餐廳撐枱腳，幾多外景出喎!
鏡頭一轉，<行貨修與花仔光> 講去飲。咦咦，又係呢件 <卡拉屋企> / <壹號皇庭> 同款大褸，睇嚟係阿靜套戰衣喎，抵佢霸到個靚位企係蘭子側邊做接待，食飯嗰陣又唔使背住鏡頭。
其實第一集個長髮靚女look真係好珍貴，因為第二集阿靜已經失驚無神變咗短頭髮，我諗極都諗唔明，係其他劇集需要? 比人落order? 定自己決定? 呢個真係一個謎，有無勁人解答到?
第三集講新年 (證明係年頭播啦)，成班嘩鬼落尖咀爭拜年鬥搶鏡。不得了，阿靜成個王靖雯倒模咁。
新年又點少得睇煙花呢，黃色大露背連身短裙再加黑絲，完全係 Everything 時期嘅王，不過都唔夠游飆扮女人咁搶鏡哈哈。
實在好鍾意睇阿靜走走糴糴出外景嘅片段，今集扮鬼扮馬去觀塘、葵盛，再返返九龍塘。
每集臨尾都會好人齊咁唱吓歌數吓白欖嗌吓口號，以前真係好團結好有心又好開心......
剪得短髮，梗係唔可以晒咗佢要扮man啦! 阿靜先同黃文標戴超扮Mark哥，再嚟個霓虹雙妹嘜做大家姐。
我成日都話阿靜咩形象都carry到，話口未完轉個頭又要做返性感姣婆，同麥喺條街度鬥放鬥露，最終麥輸咗，比阿靜電暈。
發電機又出動啦 (今次件衫同 <怒海孤鴻> 同一系列哈哈)，入圖書館電 <行貨修與花仔光>，電到佢地兩個咿嘩鬼叫，仲比蘭子趕出圖書館，笑爆。
其實我好留意阿靜同婆婆呢pair，兩個都係白羊座，兩個都唱歌拍劇做主持，兩個我都好鍾意，理應夾得到，但事實應該無friend過...... 睇呢啲節目見到佢地兩個有時咁啱編埋一齊，自己都會特別開心想睇多啲，好似呢兩幕咁，兩個一齊扮大肚婆再扮喊，真係好珍貴。
<行貨修與花仔光> 今次帶大家去抗議示威 (又著得幾行喎今次)，又係好難得同婆婆兩個孖住行，仲挨埋一齊扮攰添!
另一集扮空姐，講吓飲茶等位、高空擲物同空難，雖然同婆婆同場，但又係各有各做，無乜交流咁。
去到最尾幾集，阿靜主要part住游同羅雪玲。講開 '食死貓' 嗰陣，仲跟大隊一齊扮貓，好盞鬼!
最後一集反而無乜特別又唔多齊腳咁，阿靜婆婆幾個負責撩交嗌同眼超超，最後仲要無大合唱，有啲虎頭蛇尾。
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
雖然我唔識阿靜同馮敏清，但我估當年佢地應該係一齊入訓練班嘅同學仔，如果唔係點會成日孖住拍劇呀，繼 <浪族闊少爺> 嘅千金姊妹花同 <灰網> 嘅飛女雙妹嘜 (其實仲有好多套架，不過唔係同場咁解)，佢地兩個又有機會合作啦，就係今次呢套由關禮傑、李克勤、黎姿、雷宇揚主演嘅 <龍影俠>。
故事講到漢奸方傑同李耀敬夾手夾腳想氹大爺李龍基開礦賣比日本，引鹹濕佬梗係要用美人計啦，於是佢地出動阿靜同馮呢兩位東洋美女作為送比佢嘅 '禮物' (記得阿靜喺 <BEYOND放暑假> 入面都扮過日本姑娘嗎?)，雖然我唔知佢地兩個真實係咩關係，但係咁樣套套劇都可以有個伴一齊出吓鏡其實都幾正呀!
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
電視台密集多產式拍攝，有時拍拍埋埋都唔知幾時出街，而呢套由張衛健、吳剛、江欣燕、歐陽震華主演嘅 <拳賭雙至尊> 相信就係其中一套拍落嘅存貨，睇阿靜個髮型就知，似係91年嗰個唔長唔短嘅ONE LENGTH頭。
故事講到七屆拳王羅莽雖然喺拳賽中打贏後起之秀吳，但輿論質疑勝之不武，羅唔甘心想逼吳再打一次以證實力，於是夾埋女伴阿靜做場大龍鳳逼佢就範，阿靜一招挨身挨勢扮頭暈，吳不虞有詐諗住扶佢埋路邊休息，點知佢忽然變臉大叫非禮，羅再插把口埋嚟加鹽加醋，同佢講家陣明屈你，想無事就去比賽啦，吳只能乖乖投降應承再上擂台決鬥，阿靜即刻改口，同阿SIR耍晒冧話只係一場誤會認錯人。
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
上年阿靜同新藝寶喺 <BEYOND放暑假 + MV演出> 入面合作無間，今年夏天再下一城，唔止繼續做黃翊MV女主角，仲同佢入埋同一個劇組，參演由張兆輝、李麗珍、楊寶玲、林保怡主演嘅 <破繭邊緣>，真係好有緣喎!
不過其實佢地無同場嘅，今次阿靜做張鳳妮嘅姊妹團 (嘩䁽吓眼左上圖真係成個王靖雯咁)，負責幫呢位準新娘摷吓唔見咗嘅耳環啦、裝扮吓頭飾啦同埋屈吓開門利是咁，戲份唔多 (仲要無野心到呢，右下圖鏡頭食咗半邊面都可以唔知)，反而喺跟住落嚟介紹嘅MV入面，阿靜有機會展現三個唔同形象嘅自己。
未拍黃翊之前，阿靜喺年頭已做黃凱芹 雨中的戀人們 MV嘅女主角，以一身桃紅貼身裙/桃紅絲襪/桃紅小嘴造型狂擺蠟像甫士，一時企定揸紮花，一時無言望窗邊，一時托頭挨茶几。
到暑假黃派歌，兩首主打都繼續由阿靜擔任MV女主角，但性格形象截然不同，先講今次 <破繭邊緣> 主題曲 一世濃情，阿靜做個清純少女，同黃彈彈琴捉捉棋，咀戲亦比舊年嘅 最愛的妳 自然舒服，無再玩到好癲，反而玩浪漫著婚紗等嫁 (記得阿靜喺 <老友鬼鬼> 同 <壹號皇庭> 入面已做慣靚靚新娘嗎?)。
可惜最後交代阿靜不幸離世，黃只有不斷用投影機睇返阿靜以前啲沙龍照懷緬一番，嘩真係靚到不得了，唔講仲以為係邊個當紅嘅日本明星 (撳呢度有得睇同款造型簽名相!)。
而另一首 哭著笑 就由陳龍華老師執導，雖然阿靜都係飾演妙齡少女，但衣著化妝明顯比 一世濃情 風騷嫵媚得多，淨係睇佢放返把頭髮落嚟仲要戴晒超咁就知咩事啦，兩個遊船河又抹車，硬係影到佢好似比人包咁，但左下圖錫錫又好唔情願咁喎，而本身首歌啲歌詞其實又好深情，成件事搞到好耐人尋味......
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
