雖然我唔識阿靜同馮敏清，但我估當年佢地應該係一齊入訓練班嘅同學仔，如果唔係點會成日孖住拍劇呀，繼 <浪族闊少爺> 嘅千金姊妹花同 <灰網> 嘅飛女雙妹嘜 (其實仲有好多套架，不過唔係同場咁解)，佢地兩個又有機會合作啦，就係今次呢套由關禮傑、李克勤、黎姿、雷宇揚主演嘅 <龍影俠>。
故事講到漢奸方傑同李耀敬夾手夾腳想氹大爺李龍基開礦賣比日本，引鹹濕佬梗係要用美人計啦，於是佢地出動阿靜同馮呢兩位東洋美女作為送比佢嘅 '禮物' (記得阿靜喺 <BEYOND放暑假> 入面都扮過日本姑娘嗎?)，雖然我唔知佢地兩個真實係咩關係，但係咁樣套套劇都可以有個伴一齊出吓鏡其實都幾正呀!
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
電視台密集多產式拍攝，有時拍拍埋埋都唔知幾時出街，而呢套由張衛健、吳剛、江欣燕、歐陽震華主演嘅 <拳賭雙至尊> 相信就係其中一套拍落嘅存貨，睇阿靜個髮型就知，似係91年嗰個唔長唔短嘅ONE LENGTH頭。
故事講到七屆拳王羅莽雖然喺拳賽中打贏後起之秀吳，但輿論質疑勝之不武，羅唔甘心想逼吳再打一次以證實力，於是夾埋女伴阿靜做場大龍鳳逼佢就範，阿靜一招挨身挨勢扮頭暈，吳不虞有詐諗住扶佢埋路邊休息，點知佢忽然變臉大叫非禮，羅再插把口埋嚟加鹽加醋，同佢講家陣明屈你，想無事就去比賽啦，吳只能乖乖投降應承再上擂台決鬥，阿靜即刻改口，同阿SIR耍晒冧話只係一場誤會認錯人。
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
上年阿靜同新藝寶喺 <BEYOND放暑假 + MV演出> 入面合作無間，今年夏天再下一城，唔止繼續做黃翊MV女主角，仲同佢入埋同一個劇組，參演由張兆輝、李麗珍、楊寶玲、林保怡主演嘅 <破繭邊緣>，真係好有緣喎!
不過其實佢地無同場嘅，今次阿靜做張鳳妮嘅姊妹團 (嘩䁽吓眼左上圖真係成個王靖雯咁)，負責幫呢位準新娘摷吓唔見咗嘅耳環啦、裝扮吓頭飾啦同埋屈吓開門利是咁，戲份唔多 (仲要無野心到呢，右下圖鏡頭食咗半邊面都可以唔知)，反而喺跟住落嚟介紹嘅MV入面，阿靜有機會展現三個唔同形象嘅自己。
未拍黃翊之前，阿靜喺年頭已做黃凱芹 雨中的戀人們 MV嘅女主角，以一身桃紅貼身裙/桃紅絲襪/桃紅小嘴造型狂擺蠟像甫士，一時企定揸紮花，一時無言望窗邊，一時托頭挨茶几。
到暑假黃派歌，兩首主打都繼續由阿靜擔任MV女主角，但性格形象截然不同，先講今次 <破繭邊緣> 主題曲 一世濃情，阿靜做個清純少女，同黃彈彈琴捉捉棋，咀戲亦比舊年嘅 最愛的妳 自然舒服，無再玩到好癲，反而玩浪漫著婚紗等嫁 (記得阿靜喺 <老友鬼鬼> 同 <壹號皇庭> 入面已做慣靚靚新娘嗎?)。
可惜最後交代阿靜不幸離世，黃只有不斷用投影機睇返阿靜以前啲沙龍照懷緬一番，嘩真係靚到不得了，唔講仲以為係邊個當紅嘅日本明星 (撳呢度有得睇同款造型簽名相!)。
而另一首 哭著笑 就由陳龍華老師執導，雖然阿靜都係飾演妙齡少女，但衣著化妝明顯比 一世濃情 風騷嫵媚得多，淨係睇佢放返把頭髮落嚟仲要戴晒超咁就知咩事啦，兩個遊船河又抹車，硬係影到佢好似比人包咁，但左下圖錫錫又好唔情願咁喎，而本身首歌啲歌詞其實又好深情，成件事搞到好耐人尋味......
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
由溫碧霞、溫兆倫、羅嘉良、尹揚明主演嘅經典大劇 <火玫瑰> 相信大家都好熟悉，但唔知大家又記唔記得頭兩集入面阿靜都有份打頭陣用靚樣吸吸睛呢?
今次阿靜飾演新入嚟孤兒院嘅 '肥嘟嘟白白淨淨嗰個' (但明明 <龍的天空> 入面佢做黑妹哈哈)，身為大家姐嘅海潮同好姊妹崔嘉寶同蔡嘉利當然要噚埋阿靜玩啦，先帶佢年三十晚去行花市。阿靜今次又唔同平時咁演法，講嘢放軟放輕細聲晒，無計，要扮鵪鶉小妹妹嘛。
弊! 行到過晒鐘孤兒院閂咗閘啦! 點算好呢? 阿靜同崔兩個唔錫身搏晒命咁擒上個閘度諗住過到骨，不過梗係比sister睇到晒啦，結果齊齊被柄。
呢幕阿靜又爭到機會，落雨絲濕衝過去話比海潮聽uncle rain啱啱嚟過但又走咗。
第二集海潮幾個已經要離開孤兒院，前一晚成班女仔趁sister瞓晒後狂歡啤一啤佢。
真係要走啦，臨別依依，阿靜成班玩揮手送車尾。
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
好似年頭幾套劇阿靜又回復路人甲乙丙咁，不過音樂椅呢家嘢呢，希望在明天呀嘛，就好似呢套由歐陽震華、陳秀雯、陶大宇、蘇杏璇主演嘅經典劇集 <壹號皇庭>，監製肯比機會阿靜做單元女主角，可以話係繼 <情陷特區> 後阿靜92年嘅代表作。
故事講述好好先生孫季卿忽然墜樓，懷疑遭人凶殺，阿靜呢粒乖女陪後母于楓去差館錄口供。于聲稱孫要錢不遂發癲，自衛之下唔小心推佢落樓。
阿靜好驚阿媽有事但又一臉苦瓜乾咁話自己咩都唔知，陶同蘇都頂佢唔順怕咗佢。
COURT! 睇到阿靜咁誇張嘅表情，就知形勢不妙啦，于分分鐘被判死刑。
世上只有媽媽好，于決心幫阿靜頂罪，希望阿靜可以嫁個好老公同黃德斌重新開始，阿靜良心責備只有不停喪喊。(認得件褸嗎? 呢，<卡拉屋企> 嗰件呢)
到咗結案陳詞，阿靜無上庭，按計劃同黃結婚，陶同蘇睇唔過眼去踩場，軟硬兼施希望阿靜講出真相。
終於阿靜鼓起勇氣返法庭自首，道出頂罪背後悲慘嘅故事......
原來孫人前扮好好先生人後就不斷侵犯阿靜，無奈之下只有搬出去住，點知有次想返去探阿媽，孫又咁啱喺屋企當然又想搞佢啦，推撞之下阿靜就咁拱咗阿爸落樓 (好一個大力士哈哈)。
雖然阿靜最終被判誤殺坐監，但好人有好報，痴心老公黃決定結束晒加拿大啲生意一心等阿靜返出嚟。
<壹號皇庭> 絕對比到機會觀眾睇到阿靜有幾多斤兩。外型方面，開始比心機去扮靚，好似髮型有幾款唔同啦，化妝又執過嚟咁，衫都有好幾件換吓。演技方面，重戲份令阿靜表現到同以往唔同嘅自己，話到比人聽之前一路演啲靚妹八婆佢得，今次深度少少成熟少少有啲發揮嘅角色一樣掂，活潑啲爽朗啲嘅佢得，楚楚可憐啲苦情啲嘅又得，得咗!
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
