做演員最好玩嘅就係可以玩唔同嘅角色性格，上次 <怒海孤鴻> 做完乖乖學生妹，同一時間疊住嘅呢套由陳秀雯、呂方、關寶慧、黎耀祥主演嘅 <情陷特區>，阿靜180度大變，飾演一個攻心計嘅大陸女工，可以話係佢91年嘅代表作。
套劇叫 <情陷特區>，初初先入為主以為係講香港，原來係指深圳特區。阿靜嘅戲份主要集中喺後半部份，講到呂方受上司賞識上深圳做工廠經理，但人生路不熟又唔識普通話，仲要同班工人合宿。喺呢個時候，身為工廠小職員嘅阿靜已經蠢蠢欲動，密謀上位......
呂一到埗，阿靜已經同佢吹晒水，又幫佢翻譯博好感 (個角色好似為阿靜度身訂造咁，又內地又普通話)。機會終於嚟啦，呂請私人秘書! 阿靜於是進一步做嘢......
阿靜步步為營、不斷獻媚，宵夜熨衫揼骨乜都齊，林滋滋嘅呂當然受晒啦，終於升佢做私人秘書，比佢發圍坐正。
為咗進一步鞏固自己嘅地位，阿靜不惜犧牲色相，主動獻身! 阿靜聰明，搞關係只為工作，唔係真係想比呂包，完全唔想比人知，所以每次都好小心，仲會執走晒房入面啲私人物品。
呂一方面唔知點算好但又好回味成日心思思想敲人門，反而阿靜就忽冷忽熱食住佢。純情呂方比鬼迷，仲將老婆關寶慧送比佢條鍊轉送比阿靜，阿靜仲要嫌cheap話要比返錢佢，完全處於上位。
其實關一早已經唔想呂上去，因為實知佢受唔住誘惑，仲要大住個肚特別多疑，最後都係忍唔住殺上去check，一check就斷到正一正，點知阿靜反轉豬肚，笑佢上嚟做小丑娛賓，燸到上心口嘅呂咁都唔知衰仲趕關走，關傷心欲絕返香港密謀喺湯水度落毒，等呂返嚟毒死佢，但當然最後良心發現打爛碗湯啦，其他後話唔多講。
阿靜東窗事發，為免招人話柄，自己調去會計部，難為呂唔知醜仲難捨難離想佢留低，阿靜頭也不回。
其實套劇最搞笑嘅係，幾個月前關同阿靜喺 <三八佳人> 入面做八婆好姊妹一齊打牌，但今次一個做師奶一個做狐狸精，形象完全變晒仲要打大交哈哈。
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
一浪接一浪，阿靜好快就有機會做啲有名有姓嘅正規角色，好似今次要講嘅呢套由林文龍、劉錫明、梁藝齡、黎姿主演嘅 <怒海孤鴻> 咁。
今次阿靜飾演修哥胡楓同南紅個寶貝女，接濟一眾喺上面落嚟嘅遠房親戚主角 (好好笑，廣東話都未講得正反而要佢扮香港人哈哈)，好多日常生活情節都係以佢屋企為基地，所以都叫做由頭帶到落尾，而阿靜亦做好本份，所有誇張大笑伸脷得意嘅學生妹表情全部交足，最神奇嘅係一個新人已經有服裝贊助，既然係咁我就集中講吓佢啲 '靚衫' 先。
打頭陣校服LOOK：但其實點解套套劇都要講到啲仔女個個無心向學/淨係識得睇電視/一提起玩就精神，不過咁又係嘅，如果唔係又真係無乜嘢好講。
睡衣LOOK：同梁SHARE上下格床，好多閨房心事戲自然預埋阿靜一份，聽吓電台攬吓公仔望吓阿LAM張海報開開心心又一日。
屋企LOOK：都係啲普普通通嘅純色TEE，不過嗰件哈哈笑衫真係笑咗。
出街LOOK：呢兩件叫做有返啲款，不過就著到好老積咁，仲要攝衫配牛褲/白褲，無計，興嘛。
最後一集講到劉壞事做盡，仲趁夜深潛入阿靜屋企搶林同黎個孽種諗住標參索錢，幾個醒晒同佢死過但當然搞唔掂啦，仲要本身煲緊水無熄到煤氣，林又好衰唔衰見無人應門就撳門鐘，結果阿靜一家三口大爆炸慘死，無陰公囉。
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
除咗音樂節目，阿靜亦有機會涉獵綜藝搞笑節目啦! 講緊嘅就係由廖偉雄、胡大為主持嘅 <笑星救地球(第二輯)>。
不過好可惜，網上大部份嘅片段淨係得第一輯，第二輯入面而又咁啱有阿靜份嘅只有上面一千零一個短片。佢喺 <伍姑娘與烏啄啄> 入面戥腳做等位茶客，當廖等嬉笑怒罵完之後就由林家棟佢地幾個細嘅比人笑吓打吓完場。片段所見阿靜又係做返自己，牛記笠記咁。
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
除咗劇集演出，阿靜都執到支好籤參演音樂特輯 <BEYOND放暑假>，12集入面出鏡3集，同BEYOND做吓趣劇搞吓笑。
上面呢集講做暑期工嘅好處：同事請食飯，阿靜飾演家強同阿PAUL嘅同事，比佢地屈請食下午茶，做暑期工嘅世榮漁人得利。
第二場阿靜做暑期工賣衫，撞正大明星BEYOND嚟濕平，即刻粉絲上身HIGH爆尖叫加喪笑，仲幫阿PAUL度埋腰圍 (不過佢未講得正 '腰圍' 兩個字哈哈)。
另一幕交代阿靜係家駒女友，但愛衣著暴露益街坊，家駒只好不斷幫佢整返好條帶又搵個身擋住，唔係講笑，阿靜呢個LOOK真係似足卿卿。
嘉賓杜德偉喺節目入面宣傳新歌 天生喜歡你，阿靜被安排扮演日本姑娘行行企企，同場仲有當年同學古巨基添!
尾二呢集 <愛情信箱> 有阿靜教大家點樣溝仔同撇仔，由於只係扮學生所以打扮都係T裇牛仔褲咁做返平時嘅自己，其中一幕佢想試吓阿PAUL係咪鍾意自己，於是就問佢係咪鍾意啲女仔頭髮唔長唔短、眼大大同埋講嘢好嗲，可見阿靜正處於留長頭髮嘅尷尬過渡期。
除咗廣東話，英文亦係阿靜嘅一大考驗，上面講佢吹雞搵仔去踩冰，片段所見JAMES/RAYMOND等英文名佢仲未講得正。
除咗 <BEYOND放暑假>，阿靜同期亦喺黃翊 最愛的妳 MV入面擔任女角演出，歌曲受公司力捧，連帶阿靜嘅化妝衣著似乎都有得執執，黃色褸加花花短裙，望落似貴嘢。
睇佢地兩個老友鬼鬼玩得好放好癲，甚至係由阿靜主動獻吻，最後仲瞓埋人大脾添哈哈。
值得一提嘅係阿靜91年暑假呢兩個音樂節目都係同新藝寶歌手 (BEYOND/黃翊) 合作，唔知係咪因為咁而比佢地睇中簽埋做歌星呢?
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
哎呀叫做掂過吓時裝劇之後，阿靜有機會玩吓古裝，接拍呢套由陳松齡、鄭伊健主演嘅 <蜀山奇俠之仙侶奇緣>。
阿靜今次出現喺最尾一集嘅最尾一幕，故事交代轉世後嘅陳撞返愛人鄭嚟個大團圓結局，而阿靜就係做松松姐姐側邊嘅靚靚侍女。
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
