我返嚟啦! 趁住近排重播等我又講返呢套由陶大宇、郭可盈、郭藹明、梁榮忠主演嘅經典大劇 <刑事偵緝檔案II> 先，上次提過阿靜95年出街嘅幾個劇集皆舊瓶新酒，而今次阿靜個單元嘅劇情直頭係三年前 <壹號皇庭> 嘅倒模 (仲要一樣有陶大宇同蘇杏璇哈哈)，不過唔同嘅係阿靜嘅演技日漸成熟有推進有層次，要靈動有靈動，要崩潰有崩潰，令到呢套哎呀告別作 (應該係完約前接嘅最後一套劇?) 成為阿靜嘅又一代表作。
故事講述警方喺西貢發現一副埋咗超過七年嘅骸骨，懷疑村民方傑遭謀殺棄屍，查案期間發現法醫官麥包不但隱瞞同方嘅繼父子關係，更偷走其人頭模型有意斷去線索，而提到親生阿媽羅蘭更黑面封嘴兼落閘，但當陶同郭越查越多之際，麥居然急急腳自首認罪，話因細妹七年前被方逼到離家出走跳海自盡而心生怨恨起殺機......
陶死心不息認定麥有不可告人嘅秘密，終於查到佢七年前開始每月匯款去療養院照顧一名神秘女子阿靜，原來阿靜就係麥聲稱已去世嘅親妹，而當阿靜得知麥被起訴收押，即偷走出院向警方坦白，默默道出一個七年前嘅倫常悲劇......
話說七年前羅結識第二春方，皇帝女阿靜第一眼已經對佢零好感，家庭日仲全程當人透明，後得阿哥苦心相勸先半推半就接受佢做新爹哋。
有日阿靜放學返房 (呢個髮形既適合扮學生妹又啱做返自己，其實好靚)，點知一擰轉身就見到方裝自己換衫，小辣椒阿靜天不怕地不怕，一腳隊落方個祠堂度，仲一心諗住等羅同麥返嚟當面拆穿佢副假面具。
刁蠻任性慣嘅阿靜聰明一世其實蠢過豬頭柄，千算萬算算漏阿媽恨佬恨到發燒，方一招以退為進扮搬走分手，羅即調轉槍頭車巴阿靜 (上面呢幾個表情做得唔錯之餘又保持到靚樣，好掂)，無諗過形勢大逆轉劇情大暴走嘅阿靜憤然離家出走。
原本阿靜計劃第二日趁屋企無人再返去執幾件衫走 (好正，一個學生妹拎個LV旅行袋走難)，奈何都係敵唔過第二次嘅魔掌，阿靜雖已拼命反抗掙扎，但方一嘢質佢個頭落牆，不省人事嘅阿靜只能任人魚肉......
嗱係咪同 <壹號皇庭> 一模一樣先? 好似完全為阿靜度身訂造咁! 不過今次除咗阿靜自身演技有所提升，整個畫面描述亦比當年去得更盡，睇吓張床夠膽死整埋啲血，阿靜又識得掩住嗌痛，對比過就知三年前係幾咁含蓄同保守哈哈。
唔使問都知阿靜同上次一樣有仇報仇，要一刀插入老豆心啦哈哈。
結果阿靜因為受驚過度斷晒片而被送去聖堂休養，而自責內疚到爆嘅麥為咗補償決定幫阿妹埋屍兼頂罪......
最終阿靜因無足夠殺人證據而被判無罪釋放 (上次好乖有坐到監架哈哈)，七年無見嘅母女喺口供室外情深相擁一攬泯恩仇，阿女無事阿仔又結婚，一家人雙喜臨門甜甜蜜蜜唔再分開 (啱啱拍完 <真情> 咁快又同郭可盈同場哈哈！)
嗱嗱嗱用心演出係有回報嘅，公司特別安排阿靜去 <K-100> 拍攝一條兩分鐘嘅片花以重點宣傳佢孭飛嘅呢個單元，片段所見阿靜以賣火柴的女孩造型講述自己喺劇中嘅悲慘故事，真係我見猶憐咯！以下係收集返嚟嘅劇照同花絮剪報：
photo credit: 彌敦道人與車@weibo (13, 15 of 15)
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
