[1994] 江山如此多FUN(第二輯) (主持 鄒靜)

繼續介紹阿靜同黃霑、江欣燕、馬浚偉、鄧飛一齊主持嘅經典歷史常識問答節目 <江山如此多FUN(第二輯)>，可能大家會問點解分開寫第一輯，仲要中間夾住個 <黃浦傾情>，其實呢兩套係阿靜較早拍落嘅 (髮型仲係93年尾/94年頭嘅長髮)，反而今次呢輯係一個分水嶺，既夾住新碟宣傳，又配合暑假呢個藝人黃金宣傳檔期，所以阿靜喺形象上有明顯改變，亦都因為今輯集數較多，負責嘅環節又多咗，感覺就好似阿靜每個禮拜都陪住大家過咁 (存在感極強嘅94年!)，實在係一個好機會重新記錄阿靜每次嘅造型同狀態。


第1、2集

阿靜唔再懶就咁一味留長啲頭髮就算，開始玩吓呢款中長度髮型，效果唔錯呀，無晒娘味又夠YOUNG，至於衣著就跟大隊，經常性白色打底衫配吊帶裙，係'94女星嘅常見打扮。

今輯多咗個新環節 <難分真與假>，入面刻意將歷史故事改到錯漏百出，一眾嘉賓就要鬥數當中錯處，而第1集就做咗 <新烏江自刎>，飾演虞姬嘅阿靜同飾演項羽嘅馬雙雙自刎。


第3集

紅粉緋緋嘅阿靜，不過失策在對布鞋唔襯連身裙囉哈哈，呢集有啲搞笑，當問到 '縮骨遮' 嘅普通話點講時，霑叔就派普通話人阿靜做評判兼講MODEL ANSWER，呢啲理應一早夾好，但唔知點解本身匿喺後台安守本份嘅阿靜比霑叔急CALL之後，居然喺鏡頭面前有啲不知所措，仲係咁問咩事嗌佢，好似毫無先兆咁，讀完答案後又戰戰兢兢咁話入返去先，好似好怕阻到大家咁。

今集 <難分真與假> 嘅 <新馬嵬驛之變> 又有阿靜份，飾演楊貴妃嘅阿靜抱住個假B喺飾演唐玄宗嘅馬面前服毒自盡。


第4集

傳說中嘅'94大熱露臍裝! 襯得唔錯，條藍色花裙好得，全身好夏日清涼嘅感覺。

今集加播新拍嘅 <問誰領風SHOW> 北京特輯，睇嚟霑叔真係幾錫阿靜，帶又帶佢上去，對住佢又好似好開懷咁，片段所見佢地去咗參觀明十三陵、天壇、故宮等，而阿靜嘅打扮就貫徹返新歌 不想再假裝 嘅打歌服 (牛仔衫褲)。


第5集

又嚟紅色系列，不過今次對布鞋就襯得啱啦，整體幾活潑同可愛呀!

呢次嘅 <難分真與假>，阿靜喺 <新八國聯軍之役> 入面扮慈禧太后，關目唔錯。

而 <問誰領風SHOW> 環節就播埋淨返嘅北京特輯，繼續遊天安門、天壇同長安大街。


第6集

呢套都襯得唔錯呀!


第7、8集

呢兩集著得最DECENT，黑色真係好難出事，值得一提嘅係，阿靜喺第7集 <神州幸運輪> 入面咁啱提到自己家鄉最出名嘅蘇繡。

最後一集 <難分真與假> 玩 <新岳飛傳>，睇個樣就知阿靜扮岳母啦!


第9、10集

嘩好似初出道嘅容JOEY呀!


第11集

哈哈咁快著返第4集條靚靚藍色花裙，今次仲要襯到絕襯返個深藍露臍裝，想唔讚靚都唔得啦。


第12集

呢套著得麻麻，包得太嵌又有啲累贅咁，不過今集又好搞笑，話說 <神州幸運輪> 入面阿靜想同參賽觀眾講 '撳一撳個燈掣'，點知講咗 '近一近'，跟住勁細聲補返 '撳...... 撳燈啦'，真係尷尬到暈，仲有其他蝦碌嘢架，好似 '來者' 講咗 '賴者'，'啱晒' 講咗 '沒錯' (無講錯嘅，不過就直接讀咗普通話囉哈哈)。


第13集

大變身! 頭髮再剪短同染返黑，我估係為咗方便拍攝新古裝劇 <白髮魔女傳> 而搞嘅 (究竟阿靜係有幾咁鍾意短髮呢?)。


第14、15集

開始著返最ROUTINE嗰種白色打底衫加吊帶裙，不過啲款就略嫌CASUAL，好似越著越HEA咁 (另，第15集江個阿婆LOOK嚇親我......)，不過亦由呢兩集開始阿靜 (因為表現良好?) 被加入去 <問誰領風SHOW> 度一齊主持。


第16集

拿，搞搞套衫，搞搞PAT陰，搞搞個妝，即刻靚返晒。


第17、18集

髮型又轉，睇到阿靜又想MIX啲衫嚟著，第17集上身喺第6集度著過，第18集條 '睡褲' 喺第4集去北京嗰時著過 (其實今次唔著都得呀，條裙望落都夠長)。


第19集

漢堡神偷上身哈哈，不過作為最後一集，又好似著得唔係幾夠咁 (同埋感覺上次次呢啲節目都好虎頭蛇尾咁)......

食住 <江山如此多FUN> 嘅餘勢，阿靜同馬幾個月後再度合作主持旅遊節目 <大江南北> 介紹浙江，遲啲如果有資源再CAP多啲圖比大家睇。

－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－

[1994] 黃浦傾情 (下) (鄒靜 飾 童月白)

今次繼續講呢套同張智霖、郭可盈、邵仲衡、張鳳妮合演嘅 <黃浦傾情>。上回提到純情小白兔阿靜初入情場，為愛郎怕醜過開心過猶疑過大膽過主動過失望過嬲過又喊過，究竟佢會從此心如止水做返乖乖女定係不能自拔越嚟越貪心呢?

唔使問都知阿靜一定會仆去哈爾濱撞彩啦，點知去到嗰陣修道院已被搗亂，一眾修女生死未卜，市面更加係一片死寂，仲咁啱響起警報添，阿靜跟大隊一仆一碌咁匿入防空洞，個心又荒又亂，只有祈求聖母保佑，點知喺亂中發現COOL魔都喺裡面，二人相認一刻，阿靜不顧身世衝埋去攬實佢，雙眼明明發晒光都仲要自欺欺人話只會以朋友同修女嘅身份照顧佢。

但擺明係COOL魔照顧返阿靜轉頭啦。知道咗阿靜嚟嘅目的，COOL魔決定陪佢去搵失蹤嘅修女，點知路上比日軍發現，兩個梗係拿拿林走佬啦，途中仲要碌落山兼跌落河，一輪狼狽之後終於比佢地搵到一間空屋暫借，飢寒交迫，衫又濕晒，阿靜虛弱到錯手揼咗自己件修女袍落火堆度，唔通連個天都暗示阿靜要放棄修女身份......

孤男寡女乾柴烈火，仲要無埋修女枷鎖，阿靜同COOL魔一時衝動終於做咗一啲最唔應該做嘅事...... 事後阿靜跪雪地求聖母恕罪，但COOL魔好man咁攬晒上身，話會負責任，仲一擁阿靜入懷，本來好浪漫，點知郭又咁啱喺哈爾濱，佢地兩個又咁啱撞返佢，而阿靜又咁啱發現郭原來係佢同母異父嘅家姐，結果又變返三人行一齊返上海。

返返自己地頭，阿靜為咗奪得最後勝利明顯奸咗好多，睇左上幅圖個表情就知啦，成日話有自己照顧COOL魔就得，左攔右瞞等佢地兩個無機會單獨見面，都唔止，仲有意無意比說話郭聽，話自己因犯戒已再無資格做修女，郭意會後晴天霹靂，但事到如今仲做埋人家姐，唯有忍痛讓愛，但偏偏COOL魔成日借故偷會郭話一生最愛係佢，要相信佢......

阿靜為咗馬實COOL魔無所不用其極，今次誇到拉埋佢去修道院陪自己 '還俗'，又逼佢接受修女嘅祝福，點知COOL魔繼續心不在焉不置可否，睇右下張圖就知阿靜幾無癮。

終於連韓馬利都睇得出佢地兩個貌合神離，仲開通到暗許COOL魔同郭私奔，自己就做醜人幫COOL魔轉交分手信比阿靜，阿靜嗡口嗡面睇都唔敢睇就即刻追出去要COOL魔親口講先肯信。點知江漢原來計劃好要殺COOL魔，阿靜不知就裡撲埋去結果幫COOL魔捱咗一槍，COOL魔只好為道義、為責任、為補償而同阿靜結婚。

夢寐以求嘅幸福終於到手，點知原來要犧牲好多嘢：江為咗阿靜不惜吞槍自殺，希望還晒欠COOL魔嘅債同命，要佢放心睇住頭家，而韓眼見老公死咗自己都唔想偷生，喺墳前自盡殉夫。紅事變白事，老公又忽冷忽熱若即若離，往後嘅路只有阿靜自己一個苦苦支撐......

事隔幾年，COOL魔成功接班做上海大亨，阿靜亦成為幸福少奶奶，而郭亦下嫁洪朝豐兼生埋女去埋法國，點知一返嚟上海探佢地又出事，兩人始終餘情未了藕斷絲連，暗湧處處嘅阿靜每日只可以笑笑口翹實COOL魔隻手唔比佢走，可惜留到個人留唔住個心......

多疑、妒忌、自負、比較...... 呢一切終於令阿靜失控，日日小事化大家嘈屋閉，每次COOL魔都不慍不火叫佢唔好亂諗，但紙始終包唔住火，終於阿靜知道原來郭女嘅生父係COOL魔而非洪 (最諷刺嘅係佢自己一路都無仔生)，正當佢衝去摑郭一巴時 (仲要癲到話點解家姐要咁無恥勾引自己妹夫)，郭忍唔住鬧醒佢，根本由頭到尾佢地兩個先係真心相愛，只係每次陰差陽錯有緣無份，阿靜如夢初醒，先知自己為咗捍衛呢份所謂嘅感情而變得幾咁自私、任性、無理、幼稚，但一切已經返唔到轉頭......

上海始終係多事之地，為保安全佢地幾個洗盡鉛華避走天津重新開始，攤過牌嘅COOL魔同阿靜全程面左左好尷尬，臨訓前，阿靜煞有介事咁話自己真係唔可以無咗COOL魔，但今次再唔係攻心計咁講，而係臨別吐真言......

事情點都要有個了斷，終於喺呢晚大家杯酒當歌之際 (仲要唱返第一集嗰隻 長亭送別 作首尾呼應)，阿靜比COOL魔一個深情GOODBYE HUG之後黯然離開成全佢地，點知原來郭亦諗住再次讓愛而帶個女走，結果姊妹各散東西，而之後嘅戰亂更加令COOL魔同張鳳妮失去聯絡，四人從此各安天命。

最終COOL魔喺急救站度重遇著住護士袍趕住救人嘅阿靜，阿靜終於成長，學識咩係愛，咩先係自己最想做，重新搵返自己嘅方向，決心無私獻愛比傷者，唔會再諗兒女私情，叫佢唔使擔心，而COOL魔同郭當然最後HAPPY ENDING喺返埋一齊啦。

我認為 <黃浦傾情> 之所以咁重要係因為佢奠定咗阿靜往後嘅戲路，如果大家繼續留意小弟嘅篇章，就會發現阿靜打後嘅電視劇大多走唔出純情大小姐一廂情願痴戀男主角因愛成恨發癲最後放手成長嘅橋段。雖然我唔知其實阿靜本身鍾唔鍾意，不過真係一做就做足7年! 以下係當年一啲探班加宣傳報道：

喺度再打一篇同期嘅雜誌專訪比大家，亦都同時貼咗去GARY個BLOG度，係咪覺得好奇怪佢地兩個好似大纜都扯唔埋咁，其實人生真係好奇妙，雖然我好鍾意GARY同阿靜，鍾意到各自開咗個BLOG，但我從來都無將佢地兩個CONNECT埋一齊，直至睇到呢篇專訪先知原來阿靜同GARY係好朋友，的確令我好驚喜，好想同大家分享呢種解釋唔到嘅巧合，睇嚟呢個世界係有啲磁場影響住......

想點就點　與蔡興麟飲茶睇戲絕非拍拖　鄒靜強調自我無謂做戲咁做

早前，筆者前往某酒店的咖啡室做訪問，途中遇上了鄒靜，彼此寒暄數句後便離開；其後，筆者在咖啡室內竟看見鄒靜與蔡興麟，於是不期然地作出以下的猜想：他們在拍拖或是鄒靜為求宣傳而故意出現，因為筆者曾告知她會到咖啡室去。

實情如何？當然要找當事人來解說了。

筆者故事捉挾鄒靜說：「你同蔡興麟好熟？」

鄒靜知道筆者怎麼想，於是回應道「KAREN，我對你嘅IQ好有信心，你唔好以為一男一女約出街飲茶，就一定係拍拖啦！」

當然，男女單獨約會不能代表甚麼，但這亦不能否定雙方有發展的可能。

原來當日他們亦遇上了另一位記者，其後蔡興麟便被記者追問關於他們拍拖的事。

鄒靜對筆者說：「事後蔡興麟講番比我知，話啲記者猛咁追問我地拍拖嘅事，又同蔡興麟講，叫佢唔駛唔認，我聽咗之後覺得好好笑。」

「你叫我地認乜嘢啫，我地根本就唔係拍拖，唔係又點認喎。」鄒靜稍停一會兒，說：「原本約咗蔡興麟去睇首映，佢怕我會驚惹上緋聞，去之前仲問去唔去，我話怕乜嘢，鍾意去睇首映就去，點解要因為怕緋聞而唔去。」


易被誤解

筆者問：「咁，究竟你同蔡興麟又係點？」

「朋友囉，其實好多時都會約啲朋友出嚟飲茶傾偈，今日同呢個，明日又同第二個，如果飲吓茶就話拍拖，咁好容易俾人話我花心添。」

鄒靜說話時的語氣有點「倔」，跟她不相熟的人定必以為她的態度欠佳。

她還這樣說：「如果我真係拍拖的話，都唔鍾意同男朋友坐响咖啡室到飲茶傾偈。」

換言之，鄒靜與蔡興麟並非拖友，亦無意發展甚麼地下情，事實只是一場誤會罷。

那麼她是否故意出現，作自我宣傳呢？

「我估到你會咁樣諗，其實，初出道時都俾人話過我博宣傳，但係，我唔係，如果真係咁識得宣傳自己，就唔駛成日都唔見報。」

「我知道你會响咖啡室，但係我唔想因為要怕緋聞，怕呢樣怕嗰樣，影響到自己嘅生活，同朋友飲茶又唔係唔見得光嘅，點解要刻意避開啫。」

從簡短的對話中，筆者已感覺到她是個性格自我的女孩。

她說：「我為自己而生活，唔想因為係藝人，而影響自己嘅生活，平時我鍾意點就會去做，當然唔係犯法嘅事，如果因為自己係藝人，就話樣樣要避忌，咁樣做人，就覺得會好辛苦。」


不想變改

就在她接受筆者訪問當天，觀其束着馬尾，淡掃蛾眉赴會，亦沒有因此而拒絕拍照；而且在咖啡室內，她坐得很是隨便，把櫈子親如家中的沙發般，半躺在那裏跟筆者聊天，挑剔的人士會指說她沒有儀態，對此，她不予理會。

鄒靜說：「有人會話我應該要顧及形象，顧住自己嘅身分，但我覺得自己有乜嘢身分啫，我都係一個普通人，唔需要因為自己係藝員，而俾自己咁大嘅壓力。」

「我都知道，咁樣對自己可能無好處，可惜呢個係我嘅性格，我鍾意搭巴士就搭巴士，鍾意搭地鐵就搭地鐵，點解要改啫！」

鄒靜突然喃喃自語地說些甚麼，原來她想起祖父的一句說話：「人若改性，非死即亡。」

然後，她對筆者說：「如果你有一日見到我，扮到花枝招展、儀態萬千咁，你可能好快再見唔到我。哈、哈、哈......」

雖然這次訪問沒有「挖」到甚麼猛料，但總算加添了對鄒靜的認識，並且就她與蔡興麟的友誼關係作過求證了。

其實早喺對上一年已經有跡可尋，GARY同阿靜當時有份同台演出 <減災扶貧閉幕匯演>，睇吓佢地兩個FRIEND到呢，明明唔同唱片公司都偷偷地全程企埋一齊哈哈！

photo credit: 彌敦道人與車@weibo (15, 16, 17, 18, 19, 20 of 23)

－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－