新年快樂! 其實之前已經寫好咗呢篇，不過覺得呢套都算係阿靜最被重視同最重戲份嘅劇集，所以想整理得再好啲，遲咗少少希望大家唔好介意，講緊嘅就係呢套同張智霖、郭可盈、邵仲衡、張鳳妮合演嘅 <黃浦傾情>，由於今次內容比較多，所以會分上下兩篇，首先介紹前半劇情同埋阿靜專訪，而下篇再講後半劇情同埋宣傳花絮。
故事講述阿靜為上海大亨江漢同韓馬利嘅掌上明珠，正職係護士，得閒就返修道院幫吓修女手，生活簡單無憂，呢日仲帶埋成班小朋友去湖邊郊遊樂 (監製似乎留意到佢嘅歌星身分而比機會佢高歌一曲 長亭送別 呢!)，唱唱吓歌忽然彈咗一個受槍傷昏迷嘅小混混COOL魔出嚟，阿靜心如鹿撞得嚟又好驚，唔知佢係好人定壞人......
原來COOL魔同邵本身收咗人錢要買起江，點知混亂之下反而錯殺郭爸，仲誤傷埋郭搞到佢暫時失明，COOL魔為咗補償決定冒充郭嘅世叔伯去照顧佢，而身為護士嘅阿靜理所當然要幫埋一份啦，就咁樣不知不覺捲入呢場黑道風波同三角漩渦裡面......
好快COOL魔又計劃要綁架江，點知又再一次挾錯阿靜，先知原來佢係大亨之女，於是將錯就錯綁阿靜走 (右上圖有人又CHOK返上次 <不可思議星期二> 個玉女驚驚樣出嚟哈哈)，阿靜知道COOL魔唔會傷害佢，不但全無緊張仲同佢有講有笑，最後仲癲到一齊吹蠟燭碰酒杯慶祝自己生日，好似去玩多過比人標參哈哈。
江經過呢幾次之後暗啞底非常欣賞COOL魔同邵呢對智勇雙全嘅好兄弟，但又驚佢地威脅到自己，更加怕單純嘅阿靜一時意亂情迷被COOL魔利用同傷害，但佢地已經密密見面，一時行街，一時跳舞，一時送蛋糕，一時傾心事，逐步超出友誼關係......
阿靜情不自禁，學人飲大幾杯壯膽就鼓起勇氣攬實COOL魔表白，COOL魔曖曖昧昧不置可否，明明心入面已有郭但依然同阿靜講順其自然BUT NO GUARANTEE，自信活潑嘅阿靜當然覺得自己有機，仲話一定會令佢愛上自己。
返到屋企阿靜學人食埋個誠實豆沙包一五一十講晒比阿媽知，怕醜豬指數直達100，連韓都笑佢女仔之家今次真係太主動。
第二日COOL魔行行吓街又比人追殺，佢左手夾住郭右手拖實阿靜走佬，跑到海邊無退路，淨係問咗一句識唔識游水就一齊跳咗落去，幾經辛苦終於上返岸，點知COOL魔由頭到尾都只顧住郭，阿靜叫天不應，自己一個捱凍捱濕返歸 (呢場應該拍得好辛苦，好專業呀!)。
點知返到去都仲係眼白白睇住COOL魔對郭無微不至，阿靜即刻發癲，問佢究竟有無愛過自己，COOL魔無言而對，阿靜傷心欲絕，決定離家出走柄埋自己。
好衰唔衰韓呢個時候忽然病重，COOL魔最後喺綁架阿靜間小屋度搵返佢 (浪漫到呀，避世都搵返曾經一齊開心過嘅秘密地方)，勸佢快啲趕返去睇阿媽，阿靜日夜祈禱長跪聖母，韓終吉人天相。
阿靜應承咗聖母如果阿媽無事就會去修道院讀書侍奉，如今當然要遵守諾言開始著住件修女袍見人，上面呢幕好搞笑，COOL魔、邵、江同梁健平喺醫院度駁火，阿靜呢粒乖女梗係要撲出嚟幫阿爸擋子彈啦 (右上圖真係太有喜感哈哈)，正當以為自己實死無生，摸摸個心口仔先發現好彩有個陀錶救返自己一命。
其實係人都睇得出阿靜唔係單單為守信而做修女，更大嘅原因係要斬斷情根唔好比自己再諗COOL魔，不過郭好快復明，一眼就認出COOL魔係殺父仇人，寧願做舞女自食其力都唔原諒佢，而失去至愛嘅COOL魔亦對江湖嘅種種感到厭倦，想返哈爾濱老家重新開始，偏偏修道院又咁啱需要人手送物資去嗰度喎...... 究竟阿靜會唔會把握機會乘虛而入呢? 留待下回分解，以下送上官方靚靚造型劇照：
既然 <黃浦傾情> 係阿靜94年嘅代表作，又點可以唔聽吓佢嘅拍攝心聲呢? 下面係當年嘅一篇雜誌專訪，希望大家可以了解阿靜多啲啦!
勇於獨攬錯誤在身的新人 鄒靜天生怪病辱罵中成長
鄒靜幾年前自內地移居香港後，加入了TVB的藝員訓練班，畢業後亦獲得錄用為藝員，但坦白說句，當初她的發展誠然是平平無奇。今天，若果我再提起她名字的話，相信或會有人記得起她就是那個高唱「我愛夏日長」的女歌手。近期，她除了幸運地加入樂壇，亦同時受到了TVB的厚愛，派她去演金裝重頭劇「黃浦傾情」，劇中，她是女主角之一，戲份可算相當多。
但是亞靜(鄒靜的暱稱)和其他新人一樣，缺乏了一定的演出經驗，於是時常出錯，尤其在拍劇走位方面，經常會出現遮蓋別人面光的情況。曾經有次我去探班，卻親眼見到亞靜因為不懂走位，所以遮蓋了張智霖(劇中男主角)等的面光，結果引起了燈光師傅的微言，這時更有人出言說：「遲早我會『整鑊』給她(指鄒靜)好看的。」在場的亞靜當然聽到這句說話，於是不開心一下子全寫在面上。
慣性騰雞
事後我問亞靜：「怎麼他們這樣對你?」
「我也不知道啊，但是也不能全怪他們的，或許當時他們心情不好啦，又可能是他們的一貫作風......總之，我承認自己的演出經驗不夠，有時會帶給人家一定的麻煩，所以他們這樣我也沒有甚麼話好說。」
「其實，我已經盡量做到最好，希望能夠每場戲也一TAKE過毋須NG，但是作為一個新人的我，要學的東西還是相當多，每一場戲既要顧對白，又要顧走位，更加要全情投入去演好角色......所以，有時出錯也不足為奇，我只希望盡快適應，盡量減低犯錯的機會。」
對於工作人員對自己的不禮貌，亞靜卻抱著一點兒的阿Q精神：「他們並不是針對我，這種情形若發生在其他藝員身上，他們大有可能亦作出同樣的反應。唔......其實每一個新人亦會經過這一個階段，人家不罵你，不指出你的錯處，你又怎會成長呢?」
作為一個新人，居然一下子被派去演一些重要的角色，壓力當然不少，而亞靜的壓力，較諸於他人，無疑是高出幾倍的。
「我最大的問題就是廣東話說得不太好，唸長對白的時候每每會舌頭打結，結果未能順利而流利的說出整句說話，害得人家陪我一起NG，有時遇上兩、三頁紙的對白，我的壓力亦隨之而升級，是真的『騰雞』得很。」亞靜頓了頓又繼續說：「不過我很嬲自己，為甚麼要慣性『騰雞』呢?」
空白一片
「怎樣慣性地『騰雞』呢?」
「我也不知怎樣告訴你，不過很多時候若果我心情緊張的話，就會做出一些錯漏百出的事情。好像那次TVB安排我在頒發十年服務獎給梅艷芳和劉德華的晚會上演唱，事先我是準備好了要在合上講些甚麼的，但後來卻不知怎地，當我看見何婉盈等上台唱歌後沒有說話便下台，於是心想自己也不用講甚麼，跟著一股腦兒把預備好的說話忘得一乾二淨。可是，當輪到我出場的時候，現場的工作人員卻向我做手勢示意我說些話以便拖延時間，由於那時我滿腦子空白一片，結果只懂得張開口但一個字也說不出來。」亞靜無奈地說著。
「後來又怎樣『收科』呢?」
「也沒有甚麼特別，只是當鎮定了少許後便說了一、兩句看來無多大意思的話以打圓場。」
和亞靜的對話中處處可感到她有意將錯誤獨攬在自己身上，但新人始終是新人，言語之間亦可觀察得出她的無奈和其性格中的倔強元素。
「我可感到自己的演出正在逐步改進，現在欠的，或許只是一定的臨場經驗，所以我會在意導演、前輩們所給我的意見，但對於某一些其他人所說的話，我想我必定會過濾過才決定接不接受，因為我並不是沒有思想的，更加不會將別人的說話全放在心坎裡，以增加自己的不開心。」
亞靜雖然有著倔強的性格，但對於自己的演藝事業，卻是緊張得很，處處謙虛受教，有時更會花出比別人多出幾倍的時間來唸對白，其工作精神實在可嘉，所以正如她所說，現在她所欠的，就只是一點兒的演出經驗吧!
等我喺度貼多幾張剪報啦，如果大家有睇晒上面篇訪問，入面有講到佢同何婉盈出席公司嘅頒獎活動，以下就係當日盛況：
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
