[1995] 南京的基督 (鄒靜 飾 山茶)

其實阿靜條電影路算開得順利，先參演UFO兩套叫好又叫座嘅正片，好快又獲區丁平導演賞識去盡行藝術路線，同梁家輝、富田靖子、庹宗華合演參展電影 <南京的基督>，可見阿靜嘅古典形象有價有市。

故事講述熱愛中國文化嘅日本作家梁被新聞社派去做訪華視察員，更得大學同學庹接待，到埗第一晚已經比佢帶去藕香院尋歡，而阿靜就係藕香院入面嘅小歌女，同 <血染黎明> 一樣手抱琵琶唱評彈 (唔係扮架阿靜呢個蘇州妹真係識架!)，加上梁睇中佢表妹富田，而庹本身又係阿靜嘅大爺，所以初頭都KEEP住四人行。

可惜好景不常，富田好快發現梁原來喺日本有老婆仔女，錢又無相公又走佬，卒之搞到要賣身仲惹埋性病，阿靜泥菩薩過江，只可以喺側邊幫梁、庹睇住佢照顧佢。

平時去人地首映就去得多，今次阿靜終於一嚐主人翁嘅滋味出席自己套戲嘅首映，恭喜晒!

後記：早前根據面書介紹去咗太子一間二手書店尋寶，花咗兩個下晝終於將店內裝滿三大個紙皮箱嘅明星3R舊相逐一翻尋，下面呢三張阿靜嘅珍貴劇照就係當日嘅幸運收穫 (想睇其他可撳呢度同呢度)，大家有興趣不妨都去碰吓運氣，如果夠眼利搵到啲漏網之魚記住通知我!

photo credit: 彌敦道人與車@weibo (4 of 9)

－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－

[1995] 救世神棍 (鄒靜 飾 李太)

唔知係咪上次 <流氓醫生> 合作得開心又收得，導演隔咗半年到又再搵阿靜參演呢套由梁朝偉、陳小春、莫文蔚主演嘅電影 <救世神棍>。

今次阿靜飾演一名迷信少婦，日光日白走上天台鐵皮屋同其他信徒一齊玩催眠，期間被帶到落地獄忽然情緒失控發癲亂叫，林保怡即刻塞佢飲迷藥鎮靜返。

跟手檢查埋磁場輻射度數，林仲落晒咀頭係咁氹人買催運水晶，一輪拉扯講價之後水魚阿靜最終被坤四萬五落樓。

－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－

[1995] 香江花月夜 (鄒靜 飾 李智表妹)

今次呢套由鄭嘉穎、曹永廉、泰迪羅賓主演嘅電影 <香江花月夜>，睇嚟阿靜又係以歌星身份 (正確嚟講係同鄭哎呀同一間唱片公司?) 獲得演出機會，雖然無得好似黎瑞恩、王馨平、李蕙敏咁有唱歌戲份，但都友情客串咗一幕。

故事講到香江夜總會喺十號風球當日搞咗個麻雀大賽，開波前先影張大合照留念，點知忽然有隻落湯雞甩頭甩髻咁衝入嚟話搵表哥，原來阿靜啱啱喺上面游水落嚟諗住選香港小姐，表哥張堅庭見返青梅竹馬嘅表妹梗係開心到跳起，仲猛咁介紹比大家識，全場狂讚阿靜靚女。

－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－

[1995] 流氓醫生 (演出 鄒靜)

唔少藝人講過電影圈同電視圈係天同地，因為前者先係真正顯現到一個藝人嘅身價，努力四年，阿靜終於挾住哎呀三棲明星身份 (歌手、藝員、主持) 換到呢張拍戲嘅入場卷，開始踩過界撈多瓣，接拍由梁朝偉、劉青雲、許志安、鍾麗緹主演嘅千萬票房電影 <流氓醫生>，雖然唔係啲咩大主角，但上面幅宣傳海報有份見樣，公司唔會計錯數影錯人嘅。

今次阿靜飾演燈籠洲街坊之友 (拍攝地點實為上環歌賦街一帶)，雖然成日群埋班小姐度玩，實則只係MK妹一名，主力露吓纖腰同長腿，呢晚福音堂搞咗個聯歡晚會，阿靜梗係要趁吓墟，同隔離嘅梁詠琪 (好正，又撞多個白羊座) 同梁朝偉吹吓水啦，嚟手篤爆埋劉扮慘溝女嘅屎橋，仲笑佢黑忟忟正衰人。

另一幕講到大學教授吳耀漢得重病自知命不久矣，死LUR梁比佢偷走出院，仲話好耐無掂過女人，就算淨係攬吓都殺，兩人回頭一望喺度八卦偷聽緊嘅大排檔老板娘阿靜以為得米，點知佢玉女上身一句西埋嚟話NO，最後要出動童愛玲幫手，激死暗戀童嘅劉。

最後梁當然要扮吓浪子決定去非洲行醫，成班街坊好唔捨得佢係咁留佢，好彩鍾搵到聯名推薦梁喺香港執業，整返個大團圓結局。

唔知係咪加埋係阿靜嘅處女電影掹車邊叫做多個話題，傳媒都好似好多探班同報道 (當然呢套戲本身就已經好紅啦)，而上次應承咗大家其中一份剪報講到阿靜約滿新藝寶，網上一般就咁話阿靜退出樂壇，但就上面剪報所見，阿靜係有跳過槽嘅，不過最後因為種種原因出唔成(國語)碟...... (詳情留意日後剪報)

靚相唔怕多，下圖所見阿靜以黑白雙煞造型分別出席記者會同首映禮，好正呀，阿靜同GIGI兩個糖黐豆翹晒手咁影相，好似好FRIEND咁喎!

後記：早前根據面書介紹去咗太子一間二手書店尋寶，花咗兩個下晝終於將店內裝滿三大個紙皮箱嘅明星3R舊相逐一翻尋，下面呢張阿靜嘅珍貴單頭劇照就係當日嘅幸運收穫 (想睇其他可撳呢度同呢度)，大家有興趣不妨都去碰吓運氣，如果夠眼利搵到啲漏網之魚記住通知我!

photo credit: HKMDB (1 of 19)

－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－

[1995] 白髮魔女傳 (鄒靜 飾 何萼華)

踏入95年，阿靜表面上依舊活躍多產，加上先幾年嘅磨練同感染咗少少歌星嘅風采，成個人嘅狀態 (無論外型定演技) 都唔錯繼續有進步，但同一時間亦算係佢人生嘅一個分叉口同轉捩點，感覺到佢開始為自己打算而落咗幾個重要嘅決定：首先因為失意歌壇而離開唱片公司 (詳情留意下期剪報)，時間專注返喺電視度 (但好快又走埋，詳情留意日後剪報)，又嘗試入電影圈向外闖，可惜大環境嘅轉變，令到跟住嗰幾年條路開始好崎嶇...... 好啦先講返今次呢套'95頭炮，同蔡少芬、何寶生、陳嘉輝、陳珮珊合演嘅一線劇集 <白髮魔女傳>。

今次阿靜出現喺後半部份，劇情講到武當嫡傳弟子何同師叔李成昌比奸臣設局陷害，搞到皇帝馬德鐘中毒駕崩，二人被斬之際得妖女愛人蔡及時相救，但正邪始終不兩立，李要何同蔡斬攬兼帶佢去佢阿妹嘅白華庵度養傷，一直同姑姐喺白華庵度生活嘅阿靜一打開門見到阿爸無故重傷，梗係擔晒心緊晒張啦。

淨係靠運功療傷點夠架，阿靜決定同何一齊上山採神藥救阿爸，終於比佢地搵到要搵嘅背葉草，阿靜一支箭標去摘，點知一個唔小心仆低，何暖男上身揹阿靜落山仲幫佢捽腳，第一次得到大哥哥關懷照顧嘅阿靜芳心暗動......

同 <黃浦傾情> 一樣，全世界都睇得出阿靜有意思 (但最搞笑嘅係現實生活中反而係佢好姊妹樊亦敏對何有意思哈哈)，而李為咗親上加親，又想乘機逼何忘記蔡，更加不惜一切撮合阿靜同何。

何當然唔肯就範，但李棋高一著，叫新皇帝鄧兆尊御賜婚事，親係成咗，不過何心不甘情不願，仲喺大婚之日醉酒失態，返入新房更誤當阿靜係蔡，係咁話只愛佢一個唔好離開佢，阿靜欲哭無淚 (都話好似 <黃浦傾情> 架啦哈哈)。

第二日起身斟茶比阿爸飲，二人對人歡笑相敬如賓，實質貌合神離欲言又止......

為咗培養感情，何提議教阿靜劍術，話呢個哎呀掌門夫人點都要學吓功夫傍吓身，難得夫君主動，阿靜當然LUR飯應啦，但弱質纖纖嘅佢失手倒地，何勉強呵護後繼續教劍，除低幸福面具嘅阿靜返入房之後終於忍唔住爆喊。

終於阿靜鼓起勇氣向何攤牌，話自己早知何心入面只得蔡一個，只係希望何唔好嫌棄自己，仲話就算以後淨係得兩個共處時以兄妹相稱都心滿意足。

同一時間，諸家各派想搞擂台比武重選武林盟主，身為武當掌門嘅何被眾師叔寄予厚望派去閉關練劍，而阿靜就負責每日上山送飯，送送吓何開始對賢良淑德嘅阿靜有返些少感情，識得對住佢笑。

可惜好景不常，蔡得知何嘅婚事，及後更隨即被推落山崖，搞到個個以為佢死咗，契爺白彪上武當算帳，阿靜呢個傻女居然偉大到自捅一刀當填命求白放過何。

得返半條人命嘅阿靜仲走去求老天爺希望何贏得武林盟主之位，事後一定唔會再向佢隱瞞蔡嘅死訊，結果何當然咩都聽到晒啦，不但大力捉實阿靜雙臂，仲話蔡死咗佢實最心涼，阿靜受盡委屈都只敢扁咀，雖然何最後都肯為責任、為道義去贏個武林盟主返嚟，但亦隨即宣佈退隱江湖，激死成班師叔。

另一邊箱，天魔教返中原報仇，諸家各派被綁埋一齊等死，好彩蔡忽然現身，阿靜乘機向蔡坦白一切並求佢救大家，點知李完全唔領情仲想恩將仇報，先逼阿靜比自己打傷，再逼佢同何講係蔡打傷佢，何當然信純情阿靜啦，忍痛向蔡揮劍。

何越係悉心照顧阿靜以作補償，阿靜就越係內疚，亦心知自己時日無多，決定臨死之前向何坦白一切，今次何終於無怪阿靜，反而覺得自己欠阿靜太多，唔應該要佢受咁多苦，結果返去鬧爆完李虎毒不吃兒無人性親手害死自己個女之後，就好MAN咁捧住阿靜條屍離開武當，仲將佢好好安葬。

以下係收集返嚟嘅劇照、造型照同活動宣傳照 (好正，排阿靜隔離張相咁啱就係舊拍擋胡越山)：

最後呢張開鏡拜神相，認得件衫嗎? 應該係啱啱錄完 <江山如此多FUN(第二輯)> 趕過嚟哈哈。

photo credit: 彌敦道人與車@weibo (16, 19, 22 of 22)

－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－