年尾啦! 一年嘅樂壇成績表終於都出啦! 一如以往，鍾意親嗰啲通常都攞唔到獎，畢竟競爭實在太大，不過公司其實都做咗好多嘢作最後衝刺，總算為阿靜由年頭忙到年尾嘅歌星活動劃上一個美麗嘅句號。
有追開新藝寶嘅歌星應該都知公司好興出單曲試反應 / 宣傳，雖然阿靜無得喺年尾出多隻碟去谷，但就喺呢張壓軸 (兼悼念家駒) 精選 <碟寶> 入面貫錄三首全新歌曲：痛一次換來一個夢 / 你是我一生渴望 / 情竇初開。
痛一次換來一個夢 明顯係一首鋪路帶 '師弟' (但電視出道比阿靜早) 胡越山出嚟嘅主打歌，由監製吳通明親自作曲，係一首非常好聽嘅纏綿情歌 (鮑比達大師精心嘅爵士編曲應記一功!)，而雙J (JESSICA & JOHN) 嘅表現亦算唔錯，阿靜保持一貫高音夠氣嘅水準，而胡則帶有少少劉錫明正經拘謹嘅影子。
至於KTV入面，同樣係訓練班出身又同樣係白羊座嘅兩位都交足戲扮情侶，先喺大屋飲吓紅酒玩吓珠鏈，再去西灣河碼頭攬吓，有趣嘅係除咗呢首，阿靜仲友情FEATURE咗胡嘅一首西歌SIDE TRACK AMAMI，連同 痛一次換來一個夢 一併收錄喺胡嘅首張大碟之內。
而另一首國語新歌 你是我一生渴望 又係公司安排下同前輩許冠英合唱，呢種國語老曲風格阿靜應該由細聽到大，所以都算得心應手，可惜 情竇初開 小弟暫時未有資源，似乎係一首少女情歌。
除咗自己歌，阿靜亦擔任同公司另一位師兄邰正宵 找一個字代替 KTV嘅演出，唔知係咪想比台灣樂迷見識吓香港嘅景色，成個KTV搞到好似香港一日遊咁，而阿靜嘅部份就去咗石硤尾配水庫遊樂場，又嚟最啱佢嘅仙氣女神風，鏡頭一轉，佢地兩個一齊著住情侶裝行街街再慢步沙灘。
跟住落嚟當然唔少得'93新人巡禮嘅一系列珍貴剪報啦! 先嚟叱咤 (好好笑，鄭嘉穎比人當咗係陸家俊，而阿靜就繼續安守本份靠邊站)：
十大中文金曲：
十大勁歌金曲 (應該係捱通頂拍完嘢趕過嚟 / 病咗? 睇得出好殘但又要KEEP住笑)：
勁歌頒獎禮現場 (睇到阿靜嗎? 唔好錯咗焦點喎哈哈!)：
叱咤頒獎禮後台：
當年喺楊采妮同王馨平嘅強勁人氣下，其餘女新人就算只係爭銅獎都爭到頭崩額裂，最終由已有一定資歷同知名度嘅黎姿、許秋怡同劉玉翠成為各台嘅幸運兒，我有天真地諗過如果公司肯犧牲劉嘅分獎QUOTA，唔知個銅獎會唔會就過到去阿靜手上呢? (請別誤會，我同樣支持牛肉碎姐姐並有佢嘅CD架)，但睇完以下專訪知道原來佢地兩師姊妹係咁FRIEND，就覺得一切都唔重要啦：
老友鬼鬼 鄒靜滴汗 感動劉玉翠
某次招待會跟劉玉翠談起誰是她的圈中好友? 她開朗的道：「好朋友有很多，但最近發展中的是鄒靜，要不要跟我們談一談?」
於是胡士托又發掘了一段正在茁壯中的友誼。
這天，鄒靜略施脂粉，清麗可人，她輕托著腮，靜候劉玉翠，未幾，劉玉翠氣喘喘趕至，為她的遲到而連串說對不起。
悅耳歌聲
眾所周之，鄒靜和劉玉翠同屬一間唱片公司，然而大家在步足樂壇前，已有初步的接觸，並留下良好的印象。
鄒靜回憶說：「我記得「捉妖奇兵」在趕拍的時候，雖然我沒份參與演出，但有次我經過錄影廠，遠遠看見一個身穿白袍、頭戴花環的小女孩子，甚是可愛，我再細看清楚，才認清那個就是奪了金像獎佳新人獎的劉玉翠，心裡想：呀! 她的演技真棒呢! 剛出道，就有這樣的驕人成績。」鄒靜一面說，一面以欣賞和羨慕的眼光看著劉玉翠。
「那你呢? 對鄒靜的第一印象又如何? 」我問劉玉翠。
這時，鄒靜暗暗的低聲道：「恐怕她對我也沒甚麼印象了，那時我還很「新」呢! 」語音剛落，劉玉翠已溫柔的拍著鄒靜的肩膊說：「你錯了，我是有留意你的! 」經劉玉翠這一說，鄒靜眼睛突然睜得老大，露出意外的驚喜。
劉玉翠續說：「有次在化粧間化粧，我突然被一把悅耳動聽的歌聲吸引過來，留心的聽，是在哼著王靖雯的歌，我立即環顧四周，發現你戴著耳筒錄音機唱得入了神，那時我想：哈! 她的歌聲好動聽，不唱歌真是浪費! 哈! 更令我意想不到的是，今天，你真的做了歌手，更成為我的好朋友兼好同事。」所以嘛，這就叫做緣份了，冥冥之中總有安排。
勇於發言
在鄒靜眼中的劉玉翠，不單是個很會演戲的好演員，無論在做人處世、人生觀各方面，幾乎是十全十美，她說：
「我們一班歌手經常要跟公司開會討論工作，會上，劉玉翠總是勇敢發言的一個，只要她認為公司有不妥善的地方，她會坦率和毫無保留的說出來，這些都令我心悅誠服。
「再說，私底下，她對朋友非常真誠，你在她身上，很難發現虛偽和修飾的行為，令人很樂意跟她做朋友。」
鄒靜這樣對劉玉翠讚不絕口，難怪當我問她：「劉玉翠真的沒有任何缺點? 」
她看著劉玉翠，想了好久，一副傷神的樣子說：「唉吔! 我真的找不出她的缺點呀! 」她用無助的眼神看著劉玉翠，彷彿要從她身上找缺點是天大的難事。
這時的劉玉翠有點不好意思，將身子挨近鄒靜，打趣說：「一定有嘅，你想吓啦! 嗯... 有! 你不發覺我好固執嗎? 有時我覺得自己過份執著呢! 」
鄒靜皺著眉頭說：「我倒不覺得，你又不是蠻不講理，只是認為對的，就堅持己見罷了，這是你的性格呀。」這點胡士托也認同，一個執著的人，總比趨炎附勢、隨波逐流的偽君子好。
我問兩個女孩子：「有說同行如敵國，會不會因為利害關係而影響了你們的友誼? 」
良性競爭
劉玉翠用肯定的語氣說：「不會，我覺得就算有，都是良性競爭，何況我和鄒靜的歌路不同，雙方隨著自己的路向發展，應該沒有問題的。坦白說，假若她將來有好成績，我也很替她開心。」劉玉翠更補充，鄒靜是個很努力的新晉歌手，有次她為了有好的演出，她獨個兒躲在練舞室排練了一次又一次，練得滿頭大汗，當時看在劉玉翠眼中，竟然有一種說不出的感動，一個初出茅廬的女孩子，正努力地開拓她的前程，感覺是如詩如畫的美好。
願這對好朋友的前程如友誼般發展順利，前途有如兩旁綻放的玫瑰大道，燦爛繽紛。
後記：早前根據面書介紹去咗太子一間二手書店尋寶，花咗兩個下晝終於將店內裝滿三大個紙皮箱嘅明星3R舊相逐一翻尋，下面呢張阿靜同許冠英嘅珍貴同期合照就係當日嘅幸運收穫 (想睇其他可撳呢度同呢度)，大家有興趣不妨都去碰吓運氣，如果夠眼利搵到啲漏網之魚記住通知我!
photo credit: 彌敦道人與車@weibo (9, 11, 12, 13, 17 of 20)
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
